Iăt ală jơnau đơs bơh mpồl bơtiàn cau lơgar Việt Nam tàm lơgar Mông Cổ dê, ala măt đơng lam Đảng, Dà lơgar, ồng Trần Thanh Mẫn, Chủ tịch Quốc hội neh pơyoa tus kwang bàng, cau lơh broă tàm Anih lơh broă ala măt bal mờ gùt mpồl bơtiàn cau lơgar Việt Nam tàm lơgar Mông Cổ jơnau còp să, jơnau chờ gờm pràn kơl dang să jan bal mờ jơnau chờ gờm niam bơnĕ ngan.

Đơs loh Đảng mờ Dà lơgar sùm sền gròi lơh gơs gùng dà broă lơh gơwèt mờ cau lơgar Việt Nam kis tàm lơgar bơdìh dê, Chủ tịch Quốc hội pà git, ală jơnau dan, bơta kal ke bơh làng bol rơ̆p geh ală anih lơh broă geh gơnoar tàm lơgar pơgồp bal mờ Anih lơh broă ala măt kơlôi sơnơng, sền sơwì nàng geh ală gùng dà broă lơh di pal nàng lơh pràn lơh broă bal đah bàr lơgar dê kung bè broă dong kờl niam rơlao mpồl bơtiàn cau lơgar Việt Nam kis tàm lơgar Mông Cổ.