Tàm Ƀlàng dờng Chiến thắng (sơnah ƀòn Quy Nhơn), càr Gia Lai bơyai lơh Dơ̆ jào dờp ling nam 2026 tàm nùs nhơm niam bơnĕ, chờ hờp. Tus bal dơ̆ pơrjum geh Kwang geh jơng tàm Ƀộ Cíñ trị, Ƀộ trưởng Ƀộ Cri bơyai broă mờ lơgar ndai ồng Lê Hoài Trung; Thượng tướng Trương Thiên Tô, Phó Kwang atbồ Tổng kụk Cíñ trị Ling klàng Làng bol Việt Nam; bal mờ kwang đơng lam bồ càr, kwang bàng, cau ling mờ gal làng bol. Nam 2026, càr Gia Lai geh mờr 5 rơbô 700 nă cau lòt ling.

Broă rơwah mờ hòi lòt ling geh lơh nền nòn, di mờ jơnau geh ai, gàr niam loh làng, lơh tờm, tơl khà geh ai, tơnguh uă bơta niam. Dơ̆ jào dờp ling nam 2026 tàm càr Gia Lai mùl màl là ngai chờ bơh ơruh pơnu càr dê, pơn jăt tai geh bơta pràn nàng ală cau ling pa kơ̆ jơng lòt ling, pơgồp bal tàm broă bơ̆t bơtàu mờ sền gàr Dà lơgar.

Gơ rờm bal nùs nhơm Ngai chờ lòt ling, mờr 5 rbô 500 nă ơruh pơnu jak chài càr Dăk Lăk neh lòt gùng mut tàm mpồl ling, lơh kơnòl ndờng màng mờ dà lơgar. Tàm 15 anih jàu dờp ling gơ wèt ală tiah rơcang gàr tàm càr, nùs nhơm ki ngàm, hô hơng mơya kung ngoh rơngac ngan. Broă lơh jàu dờp ling nam do geh uă bơta pa tơnơ̆ tŭ lam lơh broă lơh gơnoar atbồ ƀòn lơgar 2 kâp mờ tơmut bal mpồl lơh broă sră pơ àr gơnoar atbồ kâp càr. Nam do, càr Dăk Lăk geh 4 rbô 600 nă cau lơh kơnòl ling klàng mờ 849 nă cau lơh kơnòl mut tàm Kwang àng làng bol.

Bơta niam, ƀằng kâp bơh cau ling pa tàm càr Dăk Lăk dê nam do pơn jat tai geh tơnguh niam, mờ mờr 330 nă ơruh pơnu geh ƀằng đại họk, kao đăng, trung kâp.

Càr Lâm Đồng dùl ròt bơyai lơh dơ̆ jàu, dờp ling nam 2026 tàm 12 anih tàm ù tiah càr, tơngăc rlau 4 rbô 600 nă làng bol lòt gùng lơh jăt kơnòl broă pal lơh dờng màng ngan mờ Dà lơgar tờm. Nam do, kờp jơh broă jàu ling bơh càr Lâm Đồng dê là 4 rbô 07 nă làng bol. Ală ơruh pơnu gơkờn rwah ndrờm pal geh tơl jơnau sồr cíñ trị, nùs nhơm, bồ tơngoh gĭt wă bơsram sră, pràn kơldang; uă cau lik klờng đại họk, kao đẳng, pơgồp bơnah tơngguh uă bơta niam cau rơcăng rwah.

Broă lơh săc rwah làng bol lòt ling geh lam lơh kơ̆ kơl jăp, làng bol lơh tờm, loh làng, song dơ pă; ală broă kờp sền nền wơl cau rơcăng rwah, rwah bơh chờm, kham rwah lơh jăt niam, di jơnau sồr.

Tàm nùs nhơm ki ngàm, ngoh rơngac, ală sàh, sơnah ƀòn tàm càr Khánh Hòa dồ ròt bơyai lơh dơ̆ jàu, dờp ling nam 2026, tơngac 3 rbô 573 nă ơruh pơnu jak ngan lòt gùng lơh kơnòl ling klàng. Nam do, ală ling pa càr Khánh Hòa dê geh jàu rê uă bè: Lữ đoàn 957 (Tiah 4 ling dà lềng), Hìu bơsram sĩ quan ling rơndeh par, Sư đoàn rơcang gàr kơl wàng trồ 377, Sư đoàn 2, Sư đoàn 305 bal mờ Gah đơng lam ling klàng càr, Kwang àng càr mờ Gah đơng lam Mpồl ling sền gàr tiah nhàr lơgar càr.

Nàng gàr bơta niam sac rơ wah ling, tơngai lài, anih lơh broă ling klàng ală kâp neh pơgồp bal nền nòn mờ kâp ủy, gơnoar atbồ, Mặt trận mờ ală mpồl bal, lơh pràn mblàng yal Adat Kơnòl pal lơh ling klàng; atbồ nền nòn khà làng bol tàm sơnam crăp rơcang lòt ling; sền sơ wì bơta niam cíñ trị nền nòn, lam lơh wil tơl bơta dong kờl, gùng dà broă lơh gơ wèt mờ ơruh pơnu lòt gùng mut ling.