Tŭ do, gùng lòt tiah tàm gùl lơgar mờ Tây Nguyên gam rơhời geh bơcri priă lơh, is ồn là ală gơl gùng rơndeh lòt mhar tiah đah tô - tiah đah jum dà lơgar mờ ală gơl gùng tàm tơrbŏ bal tiah đah mat tơngai lik - tiah đah mat tơngai mut đah Tây Nguyên mờ tiah kềng gah dà lềng. Uă rơndap broă lơh gam geh lam lơh bè Quy Nhơn - Pleiku, Khánh Hòa - Buôn Ma Thuột, Gia Nghĩa - Chơn Thành… geh kơp gơn rơp pờ tai ù tiah bơtàu tơnguh, tơrmù lơyah tŭ jơ lòt rê mờ lơh gơlik bơta ƀuơn ai lòt nhơl, logistics mờ kă bro phan in.

Bulah bè hơ̆, jat ală cau ala mat, bơcri priă lơh phan bơna ờ gơtùi mìng ơm wơl tàm broă tàm tơrbŏ ală gơl gùng ù gờl. Bơta kuơmàng rlau là pal lơh gơs ală mpồl lơh bal ndrờm bal đah ală tiah drà, anih ơhò ơm tàm dà lềng, ƀlàng rơndeh par, mpồng nhàr lơgar, anih tờm logistics mờ ală anih tus lòt nhơl. Ồng Nguyễn Trùng Khánh, Lam bồ Cục Lòt nhơl Dà lơgar Việt Nam đơs là, gùng lòt là bơta pal geh lài ngan nàng ngui ală bơta kuơ lòt nhơl dê: “Jat añ den broă kuơmàng lài ngan là pal bơsong phan bơna gùng lòt, dilah ờ geh tàm tơrbŏ bal gùng lòt den ală anih tus lòt nhơl bulah geh phan kuơ li la, gơ kờñ mơya kung ờ gơtùi cèng wơl bơta kuơ uă, ờ gơtùi bơtàu tơnguh dipal. Đơs bè phan bơna den ờ gơtùi là phan bơna gùng lòt nhơl bal mờ gam là phan bơna tàm ală tiah lòt nhơl den hơ̆ sồng gơtùi lơh gơlik bơta kuơ nàng nac in sền, tơnguh bơta niam anih tus, tơnguh bơta tàm pơrlòng anih tus dê”.

Tàm pơrjum cribơyai, ală anih atbồ, ƀòn lơgar mờ mpồl lơh sa kă bro neh bal mờ gơp cribơyai bè gùng dà bơcri priă, hòi jà priă jền tă pơgồp mpồl bơtiàn dê, bơtàu tơnguh logistics, lơh niam phan bơna tàm ală tiah, ală anih lòt nhơl mờ sơlơ tơnguh tai tàm pơgồp bal đah ală ƀòn lơgar. Bơta ndrờm bal geh ring bal là pal tam gơl bơh bồ tơngoh kơlôi sơnơng bơtàu tơnguh lòt nhơl jat nhàr ù tiah gơ gơs bơtàu tơnguh jat ù tiah mờ tiah ơm kis.

Gơ wèt mờ càr Gia Lai, tơnơ̆ tŭ tơrgùm dùl ù tiah dà lềng mờ kơh bơnơm, ƀòn lơgar geh bơta niam nàng lơh gơs ală mpồl lơh gơlik phan bơna jat gùng “dà lềng - tiah ring - kơh bơnơm - bơnơm dờng”. Mò Nguyễn Thị Thanh Lịch, Phó Chủ tịch Anih duh broă Làng bol càr Gia Lai đơs là, bơcri priă phan bơna gùng lòt tơrbŏ bal ală tiah ờ mìng là bơta chồl tơnguh ai tơnơ̆ do bơh jơh gùt tiah tàm gùl lơgar mờ Tây Nguyên dê in mờ gam lơh nền tus gơguh tai 2 nơm khà bơh tơl càr dê tàm tŭ tơngai pa: “Tŭ rề ơnàng ù tiah pa, tàm hơ̆ geh phan bơna lòt nhơl, ờ mìng Gia Lai gơguh tai 2 nơm khà mờ ală càr, ƀòn dờng bal mờ gơp hơ pơrgon bè bơta bơtàu tơnguh bal tai”.