Mho òr (19/08), Phó Củ tịc Quốk hội ồng Vũ Hồng Thanh bal mờ Mpồl lơh broă bơh Anih duh broă Lơh sa mờ Priă jền Quốk hội lơh jăt broă jăt sền ală rơndăp broă lơh kwơ màng dà lơgar bal mờ lơh sa mpồl bơtiàn càr Lâm Đồng dê.

Jăt Jơnau yal bơh Anih duh broă Làng bol càr Lâm Đồng, tàm càr do geh Rơndăp broă lơh gùng rơndeh lòt mhar Đah tô – Đah jum hờ đah măt tơngai mŭt, gơl Gia Nghĩa – Chơn Thành, jòng rơlao 124 kơi sồ, kờp jơh priă bơcri rơlao 25 rơbô 500 tơmàn đong, geh Quốk hội kĭ gùng dà bơcri priă bơh lồi nhai 6 nam 2024, mơya gam geh lơh lơyài ngan. Gùng 27C jòng 119 kơi sồ tơrbŏ càr Lâm Đồng mờ càr Khánh Hoà, geh koèl kơh Khánh Lê jòng rơlao 30 kơi sồ là tiah gơkòl tàm broă bơtàu tơnguh lòt nhơl, pơn diang phan kă bro càr dê. Tơnơ̆ mờ tŭ tơrgùm lơh loh ală gơkòl, dờp geh gùng dà broă lơh sơrlèt mờ kal ke bơh càr Lâm Đồng dê, ală kwang bàng tàm Mpồl jăt sền bơh Anih duh broă Lơh sa mờ Priă jền Quốk hội đơs niam nùs nhơm rơcang lài, lơh pràn tàm broă đơng lam, lam lơh; ai tơngŏ loh ờ uă broă lơh gam ờ pràn mờ pal tơrgùm bơsong. Phó Củ tịc Quốk hội ồng Vũ Hồng Thanh sồr càr Lâm Đồng lơh pràn ală broă lơh, rơndăp broă lơh tờm; pơgồp bal mờ ală cau bơcri priă jŏ jòng nàng bơsong niam kal ke, gơkòl nàng lơh geh bơta pràn gơguh lơh sa bơh ală rơndăp broă lơh phan kwơ geh is.