Jat jơnau yal tơrgùm wơl, tàm càr Lâm Đồng geh 134 rơndap broă lơh geh bơta kal ke, bơta gơ kòl mờ kờp jơh rlau 13 rbô 489 lồ ù, kờp jơh priă bơcri lơh là rlau 116 rbô tơmàn đong. Tus tŭ do, sền bal càr Lâm Đồng neh lơh jat nền nòn ală jơnau lơh nền tàm pơrjum, sră pơyua bơh Thủ tướng Cíñ phủ dê. Đơs pơn dut dơ̆ pơrjum, Phó Thủ tướng Duh broă sùm Cíñ phủ ồng Nguyễn Hòa Bình cih dờp bơta lơh broă jơh nùs bơh càr Lâm Đồng dê tàm tă bơsong ai ală rơndap broă lơh geh kal ke, gơ kòl in; đơs loh, Lâm Đồng kờñ pal pơn jat tai pơgồp bal jơh nùs geh cồng nha mờ ală ƀộ, gah broă lơh dà lơgar geh gơnoar tàm broă sac rơ wah, yal tơnggit, kờp sền, tă bơsong ai ală rơndap broă lơh geh kal ke, gơ kòl, gam wơl jŏ jòng in. Ồng Nguyễn Hòa Bình kung neh ai jơnau đơs, sồr lơh ngan ngồn bè broă bơsong ală broă lơh tìs; jơnau lơh nền, gùng dà broă lơh, kơnòl broă, broă lơh sac rơ wah, broă lơh tàm tă bơsong ală rơndap broă lơh, mpồl rơndap broă lơh geh git nền geh kal ke, gơ kòl, gam wơl jŏ jòng bơh càr Lâm Đồng dê gam kờñ tơrgùm bơsong.