Tàm dơ̆ tìp măt kâp dờng, Phó Thủ tướng Duh broă sùm Cíñ phủ ồng Nguyễn Hoà Bình đơs niam ală broă pơgồp bal kwơ màng mờ kwơ màng ngan bơh Ƀộ trưởng Kấp dờng ồng Lý Hiển Long dê gơwèt mờ broă lơh pràn mờ lơh nền nòn bơta git gơ̆p bàr lơgar dê kung bè bơtàu tơnguh lơh sa lơgar Việt Nam dê tàm ală jơ̆t nam do, tàm hơ̆ geh broă bơtàu tơnguh pràn kơl dang bơh mpồl ală Tiah lơh sa mờ Măi mok lơgar Việt Nam mờ lơgar Singapore (VSIP).

Phó Thủ tướng Duh broă sùm Cíñ phủ ồng Nguyễn Hoà Bình kơ̆p kờñ Ƀộ trưởng Kấp dờng pơn jăt tai sền gròi, kờñ bal mờ broă lơh pràn bơta git gơ̆p đah bàr lơgar bơtàu tơnguh pràn kơl dang, mùl màl, geh cồng nha rơlao tai kung bè dong kờl pơlam, tam pà bal broă lơh mờng chài bè bơtàu tơnguh anih tờm priă jền mờ lơh pràn broă lơh bal, tơrbŏ bal đah Anih tờm priă jền ală lơgar bơh bàr lơgar dê.