Sàh Ea Bung geh crơng gơs tàm tơngu me tơrmŭt bal bàr sàh lài do, geh bă ù ơnàng rơlao 390 kơi sồ vuông, khà kờp làng bol rơlao 9 rơbô 700 nă. Sàh neh lơh broă niam tàm mpồl lơh broă gơnoar atbồ bàr kấp dê, khà sră nggal geh bơsong di mờ tơngai geh ai mờ lài tơngai geh ai rơlao 99%.

Bŭ lah bè hơ̆, sàh do gam ờ tơl cau lơh broă, phan bơna gùng lòt, bơtơ̆t rơbòng dà neh ờ niam, lơh kal ke tus mờ lơh sa bal mờ rài kis, khà hìu rơƀah mờ pa lik klàs rơƀah gam 35,4%.

Tàm dơ̆ lơh broă, Phó Thủ tướng ồng Hồ Quốc Dũng đơs nền, Ea Bung là tiah nhàr lơgar, bơta geh gam uă kal ke, den tàng pal ai lài bơta pràn bơ̆t bơtàu phan bơna geh kwơ, tàm hơ̆ uă ngan là gùng lòt mờ bơtơ̆t rơbòng dà. Phó Thủ tướng sồr sàh pơn jăt tai sền wơl, rơndăp mpồl lơh broă di pal, niam, tơnguh cồng nha broă lơh gơnoar atbồ sàh, lơh pràn broă tam gơl sồ, lơh niam broă lơh sră nggal, ai geh bơta ƀuơn làng bol in; lơh loh ală bơta tờm lơh gơtìp rơƀah nàng geh gùng dà broă dong kờl làng bol.