Bơyai lơh tàm 2 ngai bơh ngai 19 tus ngai 20 nhai 12 tus, Pơrjum cri bơyai là dùl broă lơh niam chài – broă lơh geh kwơ màng gơwèt mờ broă lơh jŏ jòng bơtàu tơnguh càr Lâm Đồng dê tàm tơngai pa. neh geh 21 cau ala măt ală anih lơh broă bơh ală lơgar bal mờ 10 nă cau ala măt Kwang atbồ anih ala măt ală lơgar dờp tus bal pơrjum cri bơyai.

Ồng Đinh Văn Tuấn, Phó Củ tịc Anih duh broă Làng bol càr Lâm Đồng pà git, bè ù tiah Tiah kơh bơnơm Di Linh geh jòng bơh koèl kơh Bảo Lộc tus jơng koèl kơh Prenn, tàm hơ̆ geh ƀòn dờng Bảo Lộc mờ 5 kơnhoàl: Bảo Lâm, Di Linh, Đức Trọng, Lâm Hà, Đơn Dương, geh 50% bă ù càr Lâm Đồng lài do dê. Tơnơ̆ mờ tŭ tơrgùm bal 3 càr Đăk Nông, Bình Thuận mờ Lâm Đồng, Tiah kơh bơnơm Di Linh geh sền là bă ù tơrgùm tơl bơta pràn bè ù tiah geh is, trồ tiah, ù tiah, bơta niam, năng lượng tơlir mờ gùng lòt tus tàm ală tiah dê.