Tàm drim ngai 19/1, tàm Anih tờm Pơrjum Dà lơgar (Hà Nội), Pơrjum dờng cau ala măt gùt lơgar dơ̆ XIV Đảng Kộng sản Việt Nam pơrjum dar rơcăng. Lài mờ jiơ mŭt dar rơcăng, ală cau ala măt lòt Pơrjum dờng neh mŭt tàm Gơlăng ƀồc còp ies Ƀồc Củ tịc Hồ Chí Minh, ơn goàng bơkàu mờ chu ñàng tàm Anih kah kơlôi ală cau khin cha jak chài chơ̆t màng. Jơh gùt Pơrjum dờng lời dùl phuk kun bồ nàng kah kơlôi ƀồc ồng Nguyễn Phú Trọng, Tổng Ƀí thư lài do, mờ ală kwang bàng tàm Mpồl Duh broă Đảng Dà lơgar khoă XIII neh sang rài.

Ồng Trần Thanh Mẫn, Kwang bàng Ƀộ Cíñ trị, Củ tịc Quôk hội ala măt ală oh mi đơng lam tờm ngan Đảng, Dà lơgar dê đơng lam dar pơrjum rơcăng. Pơrjum dờng neh pờ tê ring bal, dồ nùs bal uă ngan ring bal Broă lơh dar pơrjum rơcăng, Jơnau pal jăt lơh broă bơh Pơrjum dờng dê, Broă lơh lơh broă bơh Pơrjum dờng dê mờ Jơnau pal jăt tĕ khà tàm Pơrjum dờng cau ala măt gùt lơgar dơ̆ XIV Đảng dê. Pơrjum dờng neh pồ Mpồl Củ tịc geh 16 nă oh mi Kwang bàng Ƀộ Cíñ trị; pồ Mpồl Cau gơnoar cih geh 5 nă oh mi mờ Mpồl Sền swì nền gơnoar broă cau ala măt lòt Pơrjum dờng geh 13 nă oh mi. Pơrjum dờng neh pờ tê ring bal gơnoar broă cau ala măt, mờ jơh ală 1 rbô 586 nă oh mi geh hòi tus bal Pơrjum dờng.