Lài mờ hơ̆, mho òr (20/01), dar cri bơyai tàm mpồl bơh ală Mpồl cau ala măt geh bơyai lơh tàm nùs nhơm nền nòn, geh kơnòl, ngăc ngar mờ song dơ pă. Ală jơnau đơs tơrgùm mblàng nền nòn ală broă dờng geh ai gơwèt mờ broă bơtàu tơnguh dà lơgar tàm tơngai pa, bơh lơh gơs kơrnoăt boh lam, lơh niam wơl mpồl lơh broă, tơnguh uă bơta pràn atbồ dà lơgar, tus mờ broă lơh pràn tam gơl sồ, bơtàu tơnguh bơta chài, tam gơl bơceh lơh, pơgồp bal tàm broă gơguh lơh sa kơl jăp pơgồp bal mờ gơguh jăk mờ ndrờm bal mpồl bơtiàn.

Pơgồp bal jơnau đơs tàm Sră nggal, uă cau ala măt đơs nền tus mờ jơnau kờñ pơn jăt tai tam gơl pa bồ tơngoh đơng lam, lam bồ jăt gùng dà broă bơceh lơh bơtàu tơnguh, ai làng bol mờ mpồl lơh sa kă bro lơh tờm, mờ lơh ngan bơsong ală bơta gơkòl, lơh kal ke tus mờ broă lơh pràn bơh lơh sa dê. Ală jơnau đơs pơgồp bal ai tơngŏ loh nùs nhơm lơh ngan cíñ trị uă, kơnòl tềng đăp Đảng, tềng đăp làng bol, pơgồp bal lơh gơs ală sră nggal yal Pơrjum dờng in, di pal mờ jơnau kờñ bơtàu tơnguh dà lơgar tàm rài pa.

Tơngume Pơrjum dờng dơ̆ XIV bơh Đảng dê đơs sùm: “Hơđơm bồng bi pơn yờ să bơh Đảng dê, pơgồp bal bơta pràn, dùl nùs bal lơh tus geh ală jơnau kờñ bơtàu tơnguh dà lơgar tus nam 2030; lơh tờm is kuơmàng, brồ guh is, pin dờn is, cơnđùa pràn tàm rài brồ să jơi bơtiàn dê”. Do là dơ̆ sơn rờp tơngume Pơrjum dờng đơs sùm bơta kơp kờñ lơh tờm is kuơmàng mờ brồ guh is jơi bơtiàn, ai tơnggŏ nùs nhơm mut gơ rờm bal jrô ơnàng mơya kung gam gàr kơ̆ bơta niam chài mờ krơi is. Bơdìh hơ̆ tai, jơnau đơs lơh broă “Tam klac bal – Làng bol lơh tờm – Duh rơngòt adat boh lam – Tam gơl pràn – Bơtàu tơnguh pràn” neh bơ tơl bơta “Tam gơl pràn”. Bơta do ai tơnggŏ bơta lơh ngan ờ mìng gàr sùm bơta kơ̆ kơljap mờ gam pal lơh gơlik ală bơta tam gơl pràn. Jat thạk sìh ồng Hà Trung Thành – Pơgru tờm Gah Bơt bơtàu Đảng, Hìu bơsram kơlôi sơnơng kwang bàng ƀòn dờng Hồ Chí Minh đơs là, Jơnau yal cíñ trị bơh Mpồl duh broă Đảng dà lơgar dê ờ mìng đơs nền broă rơndap lơh kuơmàng tus nam 2030 mờ gam cèng bơta hòi jà, là jơnau sồr lơh broă: “Jơnau đơs neh ai tơnggŏ nùs nhơm tam gơl pa, hơ̆ là đơs sùm jơnau sồr lơh gơlik bơta tam gơl pràn, ngan ngồn, đơs ngan, lơh ngan, cồng nha ngan, ờ mìng bè lơh sa mờ gam jơh bal bè cíñ trị, mpồl bơtiàn mờ niam chài. Ai tơnggŏ bơta kơp kờñ ngan jơi bơtiàn. Sền dờng màng nùs nhơm rơcăng lài is broă kwơmàng, kơnờm tàm bơta pràn is, lơh ngan is, pin dờn tàm gùng mờ Đảng bal mờ làng bol he neh sac rơ wah”.