Tàm nam 2025, trồ tiah lơh aniai neh lơh gơbàn hoàc huơr kơn jơ̆ ngan bè kòn bơnus mờ phan bơna, lơh gơ rềng tus rài kis, broă lơh sa bơh làng bol mờ ală broă lơh lơh sa mpồl bơtiàn dê. Kờp tus ngai 31/12/2025, trồ tiah lơh aniai neh lơh 484 nă cau chơt, roh thit, 811 nă cau gơtìp sồt să. Kờp jơh hoàc huơr kờp dŭ rlau 104 rbô 733 tơmàn đong.

Đơs tàm pơrjum, Thủ tướng ồng Phạm Minh Chính đơs sùm jơnau kờñ là sền gàr niam ờdo ờdă, màng kis, rài kis bơh  làng bol dê lài ngan rlau jơh; sền gàr phan bơna dà lơgar, làng bol dê dồ bă niam ngan rlau jơh, ai kòn bơnus lơh tờm, cau tờm tàm rơcang kơryan trồ tiah lơh aniai; rơcang kơryan trồ tiah lơh aniai pơgồp bal mờ lam lơh 2 jơnau kờñ 100 nam mờ bơtàu tơnguh lơh sa mhar, kơnhăp kơ̆ mờ pơgồp bơnah gơguh lơh sa 2 khà. Lơh jat jơnau đơs “Rơcang lài kơryan – Kờp dŭ lài di – Tơngkah lài dipal – Drơng wơl di tŭ”, Thủ tướng sồr ală kâp, ală gah broă lơh, ală càr, ƀòn dờng tàm tơl broă gơlik geh pal sền gàr pràn kơldang, màng kis làng bol dê lài ngan rlau jơh, ờ gŏ di sền ờ sơp, rơmơp ndơl, rơcang lài kơryan mờ tơrmù lơyah ngan rlau jơh hoàc huơr; jơh ală tài jơnau kờñ dờng ngan rlau jơh là bơta ring lơngai mờ gơboh gơbài làng bol dê.