Jơnau lơh nền tàm pơrjum sồ 79 ngai 06/01/2026 bơh Ƀộ Cíñ trị dê lơh tềl bơta tam gơl kuơmàng ngan tàm bồ tơngoh kơlôi sơnơng bơtàu tơnguh lơh sa Dà lơgar: Bơh gơnoar broă “atbồ, gơ glòm jơh” gơ gơs gơnoar broă bơt bơtàu, tề lam mờ pờ gùng ai gơguh lơh sa bơta niam uă in, tàm bơta gơ rềng tàm dong kờl mờ pơgồp bal mờ tiah lơh sa nă să is. Tàm tŭ hơ̆, Jơnau lơh nền tàm pơrjum sồ 80 ngai 07/01/2026 bơh Ƀộ Cíñ trị dê bè bơtàu tơnguh niam chài là dùl broă lơh nền geh gơtha kuơmàng ngan tàm tơngai tŭ do; ơn bơtàu tơnguh niam chài tàm tŭ tơngai mut gơ rờm bal ală lơgar, hơ̆ là bơta rơcang lài mut gơ rờm bal. Bơta pa tàm Jơnau lơh nền tàm pơrjum sồ 80 là broă tus bal tơl làm mờ pa ngan gơ wèt mờ bơtàu tơnguh niam chài. Dơ̆ sơn rờp, niam chài geh ơm tàm bơta gơ rềng nền nòn ngan mờ lơh sa, drà kă bro mờ ală gah lơh sa mờ măi mok niam chài, sền phan bơna niam chài là dùl bơta gơn kơnờm bơtàu tơnguh mờ là bơta kuơmàng bơh “Bơta pràn lơbơn” dà lơgar dê.

Đơs sồr lơh tàm pơrjum, Tổng Ƀí thư ồng Tô Lâm pà git, bàr Jơnau lơh nền tàm pơrjum pa geh bơt bơtàu bơh bơnàng jă tơn jơh làm uă bơta geh ngan mờ bơtàu tơnguh bồ tơngoh kơlôi sơnơng cribơyai tàm tŭ tơngai dà lơgar mut tàm tŭ tơngai bơtàu tơnguh pa, mờ kung bơsong 2 jơnau sồr cèng bơta bơnàng jă là gơguh “bơta pràn tàm dơlam phan bơna” mờ gàr kơ̆ “bơta pràn dơlam nùs nhơm” dà lơgar. Đơs nền bơta lơh ngan bơt bơtàu rài lơh sa krơi is, lơh tờm, ngac ngar, geh cồng nha, gơ jat bal mờ mut gơ rờm bal ală lơgar jrô ơnàng mờ bơt bơtàu rài niam chài Việt Nam gơguh jak, bềng lìu bơta niam chài jơi bơtiàn.