Tàm pơrjum, ală cau ala măt iăt lơh jăt 6 pang sră mờ geh lơh loh tơngu me tờm, mùl màl, ală bơta pa tàm Jơnau lơh nền tàm Pơrjum, Jơnau sồr pal lơh bơh Bộ Chính trị dê, mờ lơh nền nòn rơlao ală tơngu me jăt tơl gah broă. Đơs tàm dơ̆ đơng lam tàm pơrjum, ồng Tô Lam, Tổng Bí thư, Chủ tịch lơgar đơs loh, jơh 6 pang sră neh loh gùng dà broă lơh, jơnau kờñ, bơta pal jăt là bơyai lơh mờ kơnòl bơh cau lam bồ dê.

Tơl pang sră pal lơh gơs broă lơh mùl màl, geh cau dờp kơnòl, geh sền mờ cồng nha; dŭt ndơl pal lơh dà lơgar pràn rơlao, Làng bol kis niam rơlao, pin dờn kơl jăp rơlao. Tổng Bí thư, Chủ tịch lơgar đơs loh, jơh 6 pang sră ndrờm wèt tus tơnguh uă bơta pràn đơng lam, at gơnoar, bơta pràn tam dră bơh Đảng dê; bơ̆t bơtàu mpồl kwang bàng lam lài, lơh krơh, khin dờp kơnòl; atbồ broă geh niam bơyai lơh wơl bơta niam bơtàu tơnguh; ai lòt nhơl gơs bota pràn gơguh lơh sa, tơnguh ală bơta pràn jơi bơtiàn. Tổng Bí thư, Chủ tịch lơgar sồr, tơnơ̆ mờ Pơrjum do, ală kấp ủy, anih lơh broă, ală càr, ƀòn dờng, cau lam bồ pal sền kơnòl broă tờm; jào di cau, tơl gơnăp gơnoar, tơl pràn; loh phan geh lơh, tơngai lơh, kơnòl broă.