Jat hơ̆, tàm 2 ngai, ngai 25 mờ 26/3/2026, rlau 90 nă cau ala mat neh pồ gơ kờn Quôk hội khoă XVI tus bơh 15 càr, ƀòn dờng tàm tiah tàm gùl lơgar mờ tiah đah Jum dà lơgar dê rơ̆p geh tề lam, kơlôi sơnơng ală tơngume bè Broă lơh Quôk hội dê; Yal tơngĭt bè broă lơh Tam gơl sồ mờ ală phần mềm drơng broă broă lơh Quôk hội, bơto pơlam ngui App Quôk hội sồ 2.0; Bơta chài sền sơwì, tă pơgồp jơnau đơs tàm lơh adat boh lam bơh Cau ala mat Quôk hội; Bơta chài tìp mat mờ cau tĕ khà bơh Cau ala mat Quôk hội dê; Bơta chài tìp mat mờ gah yal tơngĭt jơnau, sră ƀăo bơh Cau ala mat Quôk hội dê.

Đơs đơng lam tàm Pơrjum, Thượng tướng ồng Trần Quang Phương- Phó Củ tịc Quôk hội đơs sùm, dơ̆ tĕ khà Cau ala mat Quôk hội mờ Mpồl duh broă Làng bol ală kấp tơngai lơh broă bơh nam 2026-2031 neh geh cồng nha niam ngan, ngan ngồn là dùl tềl lời wơl tàm broă lơh bơt bơtàu broă lơh làng bol lơh tờm sàh hội củ nghĩa bơh dà lơgar dê. Mờ khà cau tĕ khà lòt đùh sră uă ngan rlau jơh bơh lài tus tŭ do lơh geh 99,7%, cau tĕ khà neh pồ 500 nă Cau ala mat mut tàm Quôk hội khoă XVI. Mờ nùs nhơm geh kơnòl mờ bơta pin dờn ngan, làng bol neh đơs nền nùs nhơm ờ tŭ lơi tam gơl lòt bal mờ Đảng, Dà lơgar mờ is ồn là pơyoa bơta kơ̆p gơn dờng màng tàm bơta tam gơl pa bơh Quôk hội khoă pa dê mờ kơnòl, nùs nhơm khin cha, bồ tơngoh kơlôi sơnơng bơh tơl nă Cau ala mat Quôk hội dê.