Ala măt Kwang đơng lam Đảng, Dà lơgar neh jào jơnau lơh nền bơh Mpồl đơng lam Đảng dê sồr pồ ồng Nguyễn Xuân Thắng, Củ tịc Mpồl duh broă Cribơyai jơnau tàm sră pơ àr Dà lơgar tơngai lơh broă bơh nam 2026 tus 2031, Tổng Ƀí thư ồng Tô Lâm đơs niam ală broă pơgồp bal kwơ màng bơh Mpồl duh broă Cri bơyai jơnau tàm sră pơ àr Dà lơgar ală tơngai lơh broă lài dê, tàm hơ̆ uă ngan là tàm broă kơlôi sơnơng, bơ̆t bơtàu gơs Cri bơyai jơnau tàm sră pơ àr Đảng dê, bè gùng dà guh jăt củ nghĩa sàh hội tàm lơgar Việt Nam mờ pơgồp tơn tàm broă bơ̆t bơtàu lơh gơs ală sră nggal kwơ màng Đảng dê, tàm hơ̆ uă ngan là tàm ală dơ̆ Pơrjum dờng Đảng gùt lơgar, gùng dà broă lơh bơtàu tơnguh dà lơgar tàm tơngai jòng.

Đơs tus bè kơnòl broă tàm tơngai tus, Tổng Ƀí thư sồr Mpồl duh broă Cri bơyai jơnau tàm sră pơ àr Dà lơgar pal pơn jăt tai ai tơngŏ mờ tơnguh gơnoar tờm tàm broă Cri bơyai jơnau tàm sră pơ àr Đảng dê, tàm rài bơtàu tơnguh pa dà lơgar dê. Broă Cri bơyai jơnau tàm sră pơ àr ngai sơlơ geh kwơ màng ngan tài bơh Cri bơyai jơnau tàm sră pơ àr geh pơgồp bal lơh gơs bơnàng jă nùs nhơm, gùng dà broă lơh tàm broă lơh Đảng dê mờ nùs nhơm kơlôi sơnơng jŏ jòng, gùng dà broă lơh tàm tơl tơngai, tơl tŭ nàng bơtàu tơnguh dà lơgar.