Ala mat Đảng ủy Quôk hội, Phó Củ tịc Duh broă sùm Quôk hội ồng Đỗ Văn Chiến neh yal mhar cồng nha bơh Pơrjum dờng cau ala mat gùt lơgar dơ̆ XIV bơh Đảng dê. Bè jơnau kờñ bơtàu tơnguh bơh nam 2026 tus nam 2030 mờ broă rơndap lơh tus nam 2045, jơnau yal neh ai tơlik 5 gùng dà broă lơh dờng, tàm hơ̆ đơs sùm, tơngai bơh nam 2026 tus nam 2030 kờñ pal tơrgùm tam gơl pràn tàm 3 gah cèng bơta lơh nền, hơ̆ là tam gơl pràn bè kơrnuat boh lam mờ lơh jat ngan ngồn: Lơh sir ndrờm bal adat boh lam; tơnguh bơta niam gùng dà broă lơh; sơlơ tơnguh bơta duh rơngòt lơh jat adat boh lam; gàr tơl gùng dà broă lơh dờng ndrờm geh broă rơndap lơh, tŭ tơngai hơ pơrgon, priă jền mờ mpồl jat sền broă lơh jat; lơh pràn tam gơl wơl sră pơ àr gơnoar atbồ; bơt bơtàu Cíñ phủ sồ; ai cồng nha drơng broă làng bol mờ mpồl lơh sa kă bro in là khà đo was.

Cồng nha niam ngan bơh Pơrjum dờng dơ̆ XIV dê neh ai tơnggŏ bơta pin dờn, bơta kơp kờñ, bơta lơh ngan mờ broă rơndap lơh bơtàu tơnguh pa bơh Đảng mờ jơi bơtiàn he dê. Do là bơnàng jă kơ̆ kơljap ngan nàng jơh gùt Đảng, jơh gùt làng bol, jơh gùt ling klàng he dê lơh tờm is broă rơndap lơh, pin dờn, tam gơl pràn is, bơtàu tơnguh pràn tàm rài pa, lơh tus geh Jơnau lơh nền tàm Pơrjum dờng dơ̆ XIV, tài dùl dà lơgar Việt Nam ring lơngai, lơngap lơngai is, làng bol lơh tờm, pas pràn, bơtàu tơnguh, gơguh jak, gơboh gơbài.