Tàm ală ngai do, hìu nhă lŏ H’ Búi Ayun kis tàm ƀòn Drai Sí, sàh Ea Tul ờ ru ngan mờ broă lơh tàm suơn bal mờ ròng rơpu, kơnrồ mờ sur iar. Lŏ H’ Búi pà git, hìu nhă pơdar sùm mờ 1 lồ ù suơn tam kơphe, cồng nha lơh sa ờ geh uă. Lŏ kung neh geh tŭ uă dơ̆ kơlôi tus mờ broă càn priă bơh anih priă jền nàng bơcri tai tàm broă lơh sa, mơya tài kơlôi rơcang pal ai tơngŏ phan bơna nàng geh càn priă, ờ jai tơm dồs gơtìp anih priă jền lơh dồs, den tàng gơtìp kwi kwơ sùm.

Pơgăp mờ do 7 nam, tơnơ̆ mờ tŭ sền gròi bơh hìu rềp bal dê, bal mờ mpồl cau ùr tàm ƀòn Drai Sí dê, lŏ hơ̆ sồng khin càn 70 tơlăk đong bơh anih priă jền, bơcri tàm broă tam bơrlŭ bal tòm chi sa plai tàm suơn kơphe, ròng tai iar, sur nàng ai broă lơh ờ jŏ tơngai ròng broă lơh jŏ tơngai. Broă lơh ờs mờng do dong kờl lŏ H’ Búi geh tai priă. Tus nam 2023 khà tờm chi sa plai tam bơrlŭ bal neh geh tơnhào, lŏ tơm jơh dồs lài do hơ̆ sồng pơn jăt tai càn priă nàng blơi tai ù, rề ơnàng broă lơh sa. “Lài do rài kis gam kal ke, priă geh ờ uă. Kơnờm mờ broă geh ală oh mi bơto sồr tàm broă lơh sa, hơ̆ sồng càn priă ròng tai sur, iar. Añ bơsram mờ git tàm broă ròng phan, tam phan, tam gơl phan tam, phan ròng di pal. Kơnờm bè hơ̆, den tàng tus tŭ do lơh sa hìu nhă añ neh tam gơl, cèng geh cồng nha mùl màl”.

Ờ ơm tàm broă lơh dềt, ngai sơlơ geh uă làng bol lơh broă sa tàm càr Dăk Lăk khin tàm broă sơrbì lơh sa ờ uă. Uă hìu neh khin càn git nđờ tơmàn đong priă nàng bơcri tàm broă lơh sa suơn sre pơdar: tam phan bơrlŭ bal, tuh dà, tuh phơng is pơgồp bal mờ ròng phan. Bè hìu bi Nguyễn Văn Đức, kis tàm sàh Ea Ning, neh càn 3 tơmàn đong priă nàng bơcri tàm broă blơi phan tuh dà is, lơh wàng ròng phan ndơ̆p mờ lơh suơn tam phan jŏ nam. Tŭ do, suơn kơphe tam bơrlŭ bal mờ tờm sầu riêng, tờm bơnàng mờ ròng 6 rơbô nơm ơda deh tăp mờ lơh bơnhă pơn tăp mờ măi mok pa, cèng geh pơgăp 1 tơmàn đong pah nam.

Bi Nguyễn Văn Đức pà git: “Lài do añ càn mìng 10 tơlăk đong priă nàng lơh broă dềt, ờ dờng, tŭ do den pal càn 2, 3 tơmàn đong nàng bơtàu tơnguh tàm broă lơh. Ờ geh priă den ờ gơtùi lơh. Kơnờm mờ gùng dà broă lơh bơh Dà lơgar dê, anih priă jền pờ mpồng, niam rơlao den bol añ hơ̆ sồng geh tơl bơta nàng càn khà priă di pal nàng bơtàu tơnguh lơh sa suơn sre mờ ròng phan”.

Kung bơh bơta kal ke là pal lơh geh cồng nha tŭ càn priă, lŏ Dương Thị Tuyết Sương, tàm sàh Ea Ktur neh ơm lơh broă bơh ƀòn dờng, rê tàm ƀòn nàng lơh broă. Bơh 800 tơlăk đong càn priă lài ngan, ùr bơklao lŏ rồ 2 lồ ù lời gời nàng ròng phan. Tơnơ̆ rơlao 1 nam, ală iar geh tăc mờ càn tai priă nàng tam tai kơphe, bơnàng, sầu riêng mờ kă bro phan geh lơh bơh broă lơh sa suơn sre. Lŏ Sương pà git, priă geh di tŭ neh dong kờl hìu lŏ khin tàm broă tam gơl gùng dà lơh sa. “Lài do ù hìu añ sơrbì gời, bơtoah ngan geh priă di tŭ bơh anih priă jền dê den hơ̆ sồng geh priă bè tŭ do. Tŭ do wàng ròng iar, tàm suơn tam tai kơphe mờ bơnàng bơrlŭ bal. Anih priă jền dong kờl uă ngan nàng hìu nhă añ geh càn priă di tŭ”.

Mờ làng bol lơh broă sa càr Dăk Lăk dê, priă càn tŭ do neh ờ mìng lơh tus tàm bơta kơlôi rơcang tơm dồs mờ lơh tus tàm bơta bơcri priă di pal nàng lơh geh cồng nha. Ồng Trần Văn Thương, kis tàm sàh Quảng Phú pà git, di lah mìng tă tơl kàl lơh sa den jŏ ngan hơ̆ sồng gơtùi geh nàng lơh pràn, tàm tŭ oh kòn dờng pah ngai, jơnau kờñ ngui dơ̆ den uă ngan. Càn priă anih priă jền ờ mìng nàng bơcri tàm boă lơh sa, mờ gam ai tơl bơta niam nàng drơng oh kòn in lòt bơsram tơl niam. “Di lah lơh lơyài den pal jŏ ngan, den tàng ùr bơklao añ pal lòt càn priă bơh anih priă jền. Anih priă jền kung ai tơl bơta niam nàng geh priă bơcri, geh priă nàng drơng oh kòn in lòt bơsram tus gùng tus dà, nàng tơnơ̆ do rê geh sră drơng tàm rài kis, ờ gam kơlôi rơcang bè lài do tai sồr mìng bơsram tus ơdŭ 4 là lik lơh broă”.

Mùl màl pà gŏ, tŭ tam gơl bồ tơngoh kơlôi sơnơng “ngòt càn priă gơtìp dồs” tus mờ broă “git càn priă nàng lơh pas”, làng bol lơh broă sa càr Dăk Lăk neh lơh bơh bơta kal ke gơs broă lơh geh cồng nha. Mờ jơnau mùl màl bơh anih càn priă tờm broă lơh sa suơn sre mờ ƀòn lơgar, ồng Phan Thanh Huy, lơh broă tàm anih priă jền Agribank tàm sàh Dray Bhăng, càr Dăk Lăk pà git, bơh tàm bơta ngòt gơtìp dồs, uă hìu neh kơlôi sơnơng nền nòn rơlao, lơh sa geh cồng nha rơlao. “Bơh tàm mùl màl kwang bàng lơh broă tus tàm sàh, tus tàm tơl hìu, añ neh ai càn priă mờ gŏ, tơnơ̆ mờ tŭ neh càn priă den làng bol neh tơriang, đềt mềr brồ guh mờ gŏ là rài kis bơh làng bol dê neh bơtàu tơnguh rơlao, làng bol kung kờñ ngan sơlơ rề ơnàng broă lơh sa, tàm hơ̆ uă ngan là broă lơh sa suơn sre ƀòn lơgar”.

Mờ gơnoar “anih tờm dong kờl” broă lơh sa dê, gah ƀòn lơgar brê bơnơm, phan tàm dà sùm geh Đảng, Dà lơgar sền gròi bơh ală broă dong kờl ai càn sa priă cồng ờ uă, dong kờl lơh sa. Tàm càr Dăk Lăk, priă càn ai broă lơh sa suơn sre mờ ƀòn lơgar neh lơh pràn làng bol kis tàm ală ƀòn tam gơl bồ tơngoh kơlôi sơnơng lơh broă sa suơn sre jăt gùng dà broă lơh geh cồng nha rơlao, tơnguh pràn broă ngui măi mok pa tàm broă lơh sa suơn sre. Bơh tŭ hơ̆, pơgồp bal tàm broă bơ̆t bơtàu geh cồng nha ƀòn lơgar pa.