Mho ngai 08/4, pơn jat tai dơ̆ pơrjum dơ̆ Dùl, Quôk hội khoă XVI, ală cau ala mat cribơyai tàm jơnum bè 3 rơndap lơh adat tam gơl, geh: Adat Càr lơgar, Adat tàm pơrlòng, Pà khà jờng mờ Adat pin dờn, jat yàng. Tàm hơ̆, Rơndap lơh Adat Càr lơgar (tam gơl) geh git nền bơta tờm là sơlơ tam pà kâp, jàu gơnoar tơl làm ai gơnoar atbồ ƀòn dờng Hà Nội in, pơgồp bal mờ gàr tơl priă jền, gùng dà jat sền mờ kơnòl mblàng lơh loh loh làng. Ală gùng dà broă lơh wèt tus tă bơsong ală bơta gơ kòl bè gùng lòt, tiah ơm kis, tiah drà mờ hòi jà priă jền ai bơtàu tơnguh kơnhăp jŏ in. Ai jơnau đơs tàm Adat Càr lơgar (tam gơl), Củ tịc Quôk hội ồng Trần Thanh Mẫn pà git, nùs nhơm Adat dơ̆ do dê là pal tam pà kâp, jàu gơnoar tơl làm, uă ngan rlau jơh ai gơnoar atbồ ƀòn dờng Hà Nội in jat jơnau pal jat: Hà Nội lơh nền, Hà Nội lơh mờ Hà Nội kong kơnòl.

Củ tịc Quôk hội đơs bàr pe bơta pơn rơ bơh jơnau rơcang cih adat dê, bè: rề ơnàng jơnau pal jat ngui adat boh lam; bơ tơl ờ sền sơ wì kơnòl adat boh lam; crơng gơs mpồl lơh broă sră pơ àr gơnoar atbồ lơh sa is ồn; sơlơ tơnguh gơnoar rơndap broă mpồl lơh broă sră pơ àr gơnoar atbồ ai Mpồl duh broă Làng bol ƀòn dờng in.