Drim do (07/4), tàm dơ̆ pơrjum dơ̆ Dùl, Quôk hội khoă XVI pơn jat tai broă lơh kwang bàng kâp dờng Dà lơgar. Tổng Ƀí thư ồng Tô Lâm geh ală cau ala mat Quôk hội pin dờn pồ at gơnoar broă Củ tịc lơgar Kộng hòa sàh hội củ nghĩa Việt Nam tơngai lơh broă bơh nam 2026 bơh nam 2031. Jơnau lơh nền tàm pơrjum pồ at gơnoar broă Củ tịc lơgar geh ală cau ala mat Quôk hội pờ tê ring bal. Tơnơ̆ tŭ geh Quôk hội pồ, Tổng Ƀí thư, Củ tịc lơgar ồng Tô Lâm yal bơr guh at gơnoar broă: “Tềng đap bồng bi pơrhê sơmañ rơmit dờng màng ngan bơh Dà lơgar tờm dê, tềng đap Quôk hội, làng bol mờ cau tĕ khà gùt lơgar, añ, Củ tịc lơgar Kộng hòa sàh hội củ nghĩa Việt Nam dan yal bơr: Jơh nùs dòn song mờ Dà lơgar tờm, mờ làng bol, mờ Sơnua boh lam lơgar Kộng hòa sàh hội củ nghĩa Việt Nam, lơh ngan pơnđơl pràn, lơh gơs niam tơl kơnòl broă geh Đảng, Dà lơgar mờ làng bol dê jàu kơnòl”.

Đơs guh at gơnoar broă tơnơ̆ hơ̆, Tổng Ƀí thư, Củ tịc lơgar ồng Tô Lâm ưn ngài cau tĕ khà mờ làng bol gùt lơgar mờ nùs nhơm geh kơnòl, kơp kờñ bơt bơtàu ƀòn lơgar, dà lơgar mờ bơta pin dờn jơh nùs tàm Đảng Kộng sản Việt Nam neh lơh gơs dơ̆ tĕ khà cau ala mat Quôk hội khoă XVI mờ cau ala mat Mpồl duh broă Làng bol ală kâp tơngai lơh broă bơh nam 2026 tus nam 2031 geh cồng nha ngan.