Broă lơh “Sơnam pa tàm sơm bat tê bal sền gàr dà lềng- sa tềp bềng nùs nhơm ling klàng làng bol” geh bơyai lơh tàm nùs nhơm ram mhŭ, nùs nhơm tàm sơnđàc bal. Ală dơ̆ đơs crih tam ya jờng rơ dà lềng, bồt bơlào ƀòn lơgar, rùp hin cau ling Ling dà lềng lơh kơnòl broă tàm ală ơhò lơh broă, đài, trạm ra đa, hìu dra DK1... mờ nam pa dà lơgar dê neh lời wơl uă bơta ngoh rơngăc jrô ơnàng ngềt ngơ̆t, pơgồp bơnah tam klăc nùs nhơm ling klàng làng bol tiah dà lềng, bồt bơlào, ù tiah tàm tơr è dà lềng tiah đah Jum bơh Dà lơgar dê. Đại tá ồng Phạm Ngọc Quý – Cau kông kơnòl Cíñ trị Tiah 2 Ling dà lềng pà gĭt: “Broă lơh “Sơnam pa tàm sơm bat tê bal sền gàr dà lềng- Sa tềp bềng lìu nùs nhơm ling klàng làng bol” di dơ̆ Sa tềp bơhiàn dà lềng nàng kờñ ưn ngài ală hìu bơnhă mờ cau geh sră dong kờl dà lơgar ală tiah dê, mpồl ling, mơkung dong kờl ală bơnah phan pà geh ngan ai ală ling geh griăt geh rài kis kal ke uă ngan in. Gơwèt mờ ală sau là oh kòn làng bol lơh ka mờ mpồl ling dờp dong kờl, broă lơh kung kơ̆p kờñ tam pà bal nàng ală sau mờ hìu bơnhă in wă rò dùl dơ̆ sa tềp bơtòm tơrgùm, wil tơl rlau. Bơh hơ̆, sơlơ lơh kơ̆ bơta tam klăc bal ling klàng làng bol tàm broă lơh jat ală kơnòl broă nam 2026”.

Jat Đại tá ồng Đỗ Hồng Duyên, Phó Cíñ ủy Tiah 2 Ling dà lềng: Broă lơh “Sơnam pa tàm sơm bat tê bal sền gàr dà lềng- Sa tềp bềng lìu nùs nhơm ling klàng làng bol” là dơ̆ nàng kwang bàng, cau ling bal mờ làng bol tam pà bal bơta chờ hờp wă rò sa tềp, lơh gơrề uă nùs nhơm tam klăc bal, lơh geh bơta ram mhŭ sơnam pa tàm tiah dà lềng dê. Bơh hơ̆ pơgồp bơnah mblàng yal, bơto bơtê bơhiàn niam chài sa tềp bơhiàn yau bơh jơi bơtiàn dê, lơh kah wơl nùs nhơm tàm dong tàm kờl bal tàm tơl nă kwang bàng, đoàn viên ơruh pơnu.

Tam pà bơta chờ hờp tàm broă lơh, mò Bùi Thị Thu Hương – Phó Củ tịc Anih duh broă Làng bol sàh Long Sơn, ƀòn dờng Hồ Chí Minh, pà gĭt: lơh jat gơnoar atbồ ƀòn lơgar 2 kấp, mpồl ling dà lềng sùm lòt bal mờ làng bol tàm uă broă lơh:“Tiah do sùm lòt bal mờ bol añ mờ ală broă lơh pơgồp bal ling klàng- làng bol, lơh bol lơh ka lòt tras kŭp ka tàm dà lềng, lơh broă tàm dà lềng. Tiah do sền gròi tus làng bol, sền gròi ai làng bol in bơh bơta lơngăp lơngai tàm dà lềng tus rài kis nùs nhơm kung bè phan bơna”.

Cèng tus bơta chờ hờp ai ală hìu bơnhă cíñ sác in, broă lơh gam lơh geh tai bơta gơn kơnờm ai ală kơnòm bơsram là oh kòn làng bol lơh ka geh Tiah 2 Ling dà lềng dờp dong kờl. Oh Lê Triệu Tuấn Việt, kơnòm bơsram Hìu bơsram kấp 2 Bình Châu 2, brơn brài đơs:“Kòn dờp geh phan pà bơh ală wa dê pà, kòn chờ hờp mờ brơn brài ngan. Kòn geh ală wa dong kờl tàm tŭ bơsram sră, nam pa do kòn lơh geh cồng nha là kơnòm bơsram jak. Tào dờng kòn kơ̆p kờñ geh lơh cau ling dà lềng là mpồl ling, tài bơh kòn geh ală wa dờp dong kờl nàng tơnơ̆ do tào dờng kòn kung pơgồp bơnah sền gàr dà lơgar mờ ring lơngai”.

Geh bal mờ ngoh rơngăc, bi Ngô Thị Quốc, ngoh rơngăc pà gĭt:“Añ chờ hờp ngan mờ ưn ngài ală wa neh jơh nùs dong kờl mờ dờp dong kờl kòn. Pah dơ̆ sa tềp pah nam, Tiah 2 Ling dà lềng ndrờm pơndờm pơnđiang mờ geh ală phan pà gờm chờ sa tềp ai hìu bơnhă in, bơta do ngan ngồn ngan, dong hìu bơnhă añ tơrmù ƀà uă ngan bơta kơn jơ̆. Añ ờ geh bơta lơi bơdìh mờ jơnau ưn ngài uă ngan tus mờ ală cau ling Ling dà lềng, gờm chờ ală wa dùl sơnam pa chờ hờp mờ ram mhŭ”.

Broă lơh “Sơnam pa tàm sơm bat tê bal sền gàr dà lềng- Sa tềp bềng lìu nùs nhơm ling klàng làng bol” là broă lơh cèng bềng gơtha niam jrô ơnàng uă ngan, tơngŏ nùs nhơm “Hùc dà kah tô dà”, bơhiàn “Ling mờ làng bol dùl nùs nhơm”, bơh hơ̆ pơn jat tai đơs nền kơnòl, nùs nhơm mờ bơta pin dờn bơh kwang bàng, cau ling Ling tiah 2 Ling dà lềng dê gơwèt mờ làng bol tiah do mờ oh kòn làng bol lơh ka – ală cau gam ngai mang lơh broă tàm dà lềng, sền gàr dà lềng, lòt bal mờ Ling dà lềng Làng bol Việt Nam sền gàr kơnhăp kơ̆ gơnoar tờm dà lềng, bồt bơlào dờng màng bơh Dà lơgar dê.