Lài hơ̆, ngai òr (22/1) Pơrjum dờng XIV Đảng dê neh yal cồng nha tĕ khà mờ yal măt ală oh mi pồ gơkờn mŭt tàm Mpồl Duh broă Đảng Dà lơgar khoă XIV.

Jăt yal sră ƀăo, tàm ngai lơh broă dơ̆ 4, Pơrjum dờng neh lơh broă jơh dùl ngai nàng cribơyai mờ lơh ală tơngume bè broă lơh kwang bàng Mpồl Duh broă Đảng Dà lơgar khoă XIV. Tổng Ƀí thư ồng Tô Lâm ala măt Mpồl Củ tịc đơng lam dar pơrjum. Ồng Lê Minh Hưng, Kwang bàng Ƀộ Cíñ trị, Ƀí thư Đảng Dà lơgar, Lam bồ Mpồl Rơndăp broă Dà lơgar ala măt Mpồl Củ tịc sền Jơnau yal Mpồl Duh broă Đảng Dà lơgar khoă XIII dê bè broă lơh kwang bàng Mpồl Duh broă Đảng Dà lơgar khoă XIV.

Pơrjum dờng neh bơyai lơh cribơyai mờ pờ tê ring bal khà Kwang bàng Mpồl Duh broă Đảng Dà lơgar khoă XIV là 200 nă oh mi, geh 180 nă oh mi là Kwang bàng geh jơng ngan ngồn mờ 20 nă oh mi là Kwang bàng geh jơng rơcăng lài. Ală cau ala măt kơlôi sơnơng, cribơyai Jơnau yal broă lơh kwang bàng Mpồl Duh broă Đảng Dà lơgar khoă XIV; tơlik măt tĕ khà, sồr pồ mờ kơlôi sơnơng ală sră pơ àr, sră nggal kwang bàng.

Mpồl Củ tịc iăt ală oh mi lam bồ mpồl yal bè cồng nha cribơyai bơh ală Mpồl cau ala măt dê gơ wèt mờ Jơnau yal broă lơh kwang bàng Mpồl Duh broă Đảng Dà lơgar khoă XIV; broă tơlik măt tĕ khà, sồr pồ, ală cau dan lik bơh sră cih măt tơlik măt tĕ khà, sồr pồ tàm sră cih măt tĕ khà. Mpồl Củ tịc yal Pơrjum dờng in mờ pờ tê ring bal sră cih măt tĕ khà Mpồl Duh broă Đảng Dà lơgar khoă XIV; pồ Mpồl Kờp sră; Mpồl Kờp sră pơlam broă tĕ khà.

Pơrjum dờng bơyai lơh cih sră, đùh sră, yal cồng nha mờ yal măt ală oh mi pồ gơkờn mŭt tàm Mpồl Duh broă Đảng Dà lơgar khoă XIV.