Jăt jơnau yal, bơh bồ nam tus tŭ do, Dăk Lăk gĭt gŏ mờr 4 rbô 200 nă cau bơtờp kòp mprơm gơlik mhàm, gơguh mờr 40% pơndrờm bal dùl tŭ mờ nam 2025. Pal sền ngăc, càr neh gĭt gŏ cau chơ̆t bơh chờm tài kòp mprơm gơlik mhàm tàm nam do tàm sơnah ƀòn Tân An.

Bơta pal kơlôi rơcăng ngan là tàm tơngai sơnrờp, jơnau tơnggŏ kòp mprơm gơlik mhàm digơlan gơlơh ndrờm ngan mờ ală kòp lơh gơbàn duh să ờs mờng. Kòn dềt digơlan mìng duh să uă, glar să, ñìm bơthĭ, sàu sa ờ pràn, lơh mè bèp ƀươn ờ rơcăng. Bulah bè hơ̆, tŭ mŭt tàm tơngai sơbơng roh, kòp digơlan gơbàn kơn jơ̆ mhar ngan, geh sơ wing, gơlik mhàm halà gơmù bơta pràn ală phan tàm să jan. Ƀak sìh mìng gah II ồng Đặng Việt Nam, Gah Kòn dềt Bơrlŭ bal, Hìu sơnơm Uă gah tiah Tây Nguyên, tơngkah:

“Ală cau kòp là kòn dềt geh lài kòp tàm să halà gam bơtờp ală kòp jŏ nam den kờñ pal kah jăt sền mờ sền gàr ngan, geh tŭ pal mŭt hìu sơnơm gờñ rlau mờ ală cau ndai. Pơnyơu kòn dềt kơn jơ̆ kĭ lơmă ir, kòn dềt bơtờp ală kòp jŏ nam bè jơnau gơbàn leh ờ niam gam ngui ală bơta sơnơm kơryan ờ bơtờp kòp…Do là ală cau geh pràn dră wơl kòp lơbơn ngan den tàng tŭ bơtờp kòp rơ̆p gơbàn kơn jơ̆. Halà ală kòn dềt rơgai ờ pràn, is ồn ală kòn dềt rơgai ờ pràn ir, rơgai ir, kòn dềt gơtìp hian, phế quản, kòp plai nùs bơh mè deh…Dilah kham gŏ bơtờp kòp mprơm gơlik mhàm den pal mŭt hìu sơnơm piam kòp gờñ”.

Tềng đăp bơta gơbàn kòp mprơm gơlik mhàm gơguh uă, Anih duh broă Làng bol càr Dăk Lăk neh sồr ală sờh, mpồl, gah mờ ƀòn lơgar rơcăng lài lam lơh ală broă lơh bơsong rơcăng, kơryan, bañ lời kòp bơtờp uă, lơh gơrề uă mờ jŏ jòng.

Sờh Lơh sơnơm geh jàu lơh anih tờm jăt sền broă gơlik geh, sơlơ jăt sền tai, yal tơngkah lài jơnau pơhìn; sồr Anih tờm Gròi sền kòp jê càr pơgồp bal mờ alăn ƀòn lơgar bơsong jơh tiah geh kòp, gơsơ̆t kih dà, tăp sơmack mờ ƀồm dà sơnơm gơsơ̆t sơmack tàm ală kơnhoàl ù tiah pơhìn uă. Ală anih kham, sơm kòp rơcăng lài cau, sơnơm, phan ngui, jơnờng kòp, tơngguh uă pràn jak sơm kòp, tơrmù ƀà cau kòp kơn jơ̆ mờ chơ̆t.

Bal mờ gah Lơh sơnơm, ală sờh, mpồl, gah, mpồl cau mờ gơnoar ătbồ kâp hơđơm geh sồr sơlơ mblàng yal, hòi jà làng bol lơh sàng goh tiah ơm kis, sơrbì jơh phan ơn pơdơng dà, gơsơ̆t kih dà, tăp sơmăck êt ngan pah poh bơh dùl dơ̆ tàm anih lơh broă, hìu bơsram, anih lơh sa, kă bro mờ tiah làng bol ơm kis.

Ală sàh, sơnah ƀòn kong kơnòl tơn bè broă lơh rơcăng, kơryan kòp bơtờp tàm ù tiah he dê; kờp sền wơl kơnhoàl ù tiah pơhìn uă, bơsong di tŭ cau kòp, tiah geh kòp mờ hòi tơrgùm ală mpồl tus bal.

Kòp mprơm gơlik mhàm ờ gŏ di là tŭ lơi kung sơnđờm bơh ală tềl tơnggŏ loh làng. Tài bè hơ̆, bal mờ bơta mŭt lơh bal bơh gah geh gơnoar dê, broă làng bol rơcăng lài sơrbì tiah sơmăck deh dùh, rơcăng pleh sơmack kăp, mờ jun kòn dềt lòt kham gờñ tŭ geh tềl tơnggŏ ờ bè ờs ngan là broă geh kwơ ngan nàng kơryan kòp gơbàn kơn jơ̆ mờ tơrmù jơnau pơhìn bơtờp uă kòp.