Jat jơnau yal, kờp jơh khà cau tĕ khà gùt lơgar dê tàm mat lòt tĕ khà ngai 15/3 là: 76 tơlak 516 rbô 637 nă cau; tàm hơ̆ khà cau tĕ khà neh lòt đùh sră pồ là: 76 tơlak 43 rbô 527 nă cau (geh 99,38%). Càr Lào Cai là càr lơh gơs tĕ khà gờñ ngan rlau jơh bal mờ ƀòn dờng Huế là 2 tàm 34 càr, ƀòn dờng geh 100% cau tĕ khà lòt pồ. Is ồn, càr Lào Cai geh 173 nă cau tĕ khà bơh 100 sơnam rlau hơđang.

Tŭ tĕ khà, ală anih lơh broă mblàng yal jơnau tàm lơgar mờ ală lơgar sùm jat sền nền nòn mờ yal bè dơ̆ tĕ khà tàm ală càr, ƀòn dờng, ală tiah đùh sră. Sền gròi tus broă yal bè broă lam lơh gơnoar tĕ khà bơh ală kwang đơng lam bồ Đảng, dà lơgar, mpồl phàu crong, cau tĕ khà dờng sơnam, cau tĕ khà kơnòm să dơ̆ sơn rờp lam lơh gơnoar tĕ khà, làng bol jơi bơtiàn dồ êt nă cau, cau kơ đơng yàng, cau tĕ khà tàm tiah nhàr lơgar, bồt bơlàu, tiah kơh bơnơm, ală tiah kal ke,… Bơh hơ̆, ai gŏ dơ̆ tĕ khà geh bơyai lơh làng bol lơh tờm, bơnĕ bơnài, di broă rơndap lơh, rơndap tap sèng, sră nggal jat jơnau cih adat boh lam dê; jơnau git wă geh kơnòl mờ nùs nhơm chờ hờp chờ hờn tàm Ngai chờ jơh gùt làng bol.