Rlau 3 nhai do, pah dơ̆ trồ mang bơh ngai dơ̆ 2 tus ngai dơ̆ 6, ơdŭ tơn jơh bơta ờ gĭt sră tàm Hìu bơsram kấp 1 Trần Phú (xã Ia Dom, kơnhoàl Đức Cơ) den àng wơl đèng mờ mpoong săp ală jơnau đơs bơsram sền sră dê. Ơdŭ bơsram geh mờr 40 nă cau là làng bol jơi bơtiàn dồ ết nă cau tus bơh ală ƀòn bơh xã Ia Dom, kơnhoàl tiah nhàr lơgar Đức Cơ, càr Gia Lai dê.

Tàm ơdŭ bơsram, mò Siu H’Phem (ơm tàm ƀòn Mok Đen 2, xã Ia Dom, kơnhoàl Đức Cơ) 54 sơnam, cau bơsram dờng sơnam ngan rlau jơh, pơn niam ngan cih akhar. Mò đơs, sơnam neh dờng, bơsram băt gĭt ngan mơya mò tơryang tơryồng ngan tus tàm ơdŭ, tŭ do neh gĭt sền sră, cih is mat he dê. Mò Siu H’Phem, đơs:“Tŭ do, añ gam lơh ngan jat bơsram ơdŭ tơn jơh bơta ờ gĭt sră do mờ kơ̆p kờñ tềng đăp mat là să tờm añ pal gĭt cih, gĭt sền sră, ngan ngồn là gơtùi cih is mat, sơnam bơh he dê, mờ tơl nă cau gùt dar tai, den añ gam jơh nùs lơh ngan nàng bơsram. Añ jat bơsram ơdŭ tơn jơh bơta ờ gĭt sră do ờ mìng ai să tơm añ in lơm mờ gam gơtùi bơto wơl ai oh kòn kòn sau in tai”.

Mă kòn 5 nhai tàm ngkời, bi Rơ Mah H’Với (ơm tàm ƀòn Mok Đen 1, xã Ia Dom) ơm mŏ iăt ùr pơgru bơto jơnau bơsram. Bi H’Với pà gĭt: 26 sơnam, geh 3 nă kòn, rài kis kal ke ngan. Ơdŭ bơsram là tŭ tơngai niam ai bi in gơtùi brồ guh, den H’Với tơryang tơryồng tus tàm ơdŭ bơsram tàm pah dơ̆ trồ mang bulah hìu ngài mờ hìu bơsram tus 10 kơi sồ. Bi Rơ Mah H’Với, đơs: “Añ jat bơsram ơdŭ tơn jơh bơta ờ gĭt sră mờ kơ̆p kờñ gĭt akhar nàng gơtùi bơto wơl ai oh kòn in, mờ tŭ lơh sră pơ àr den he gĭt kĭ mat he dê. Hìu bơnhă den kal ke ngan den ờ geh ală bơta nàng lòt bơsram, tŭ do geh bơta sền gròi bơh gơnoar atbồ tiah do dê pờ ơdŭ bơsram tơn jơh bơta ờ gĭt sră añ jơh nùs lơh ngan jat bơsram nàng gĭt akhar, nàng ƀuơn ƀoài tŭ lòt lơh sră pơ àr să tờm he dê”.

Ùr pơgru Trương Thị Cúc, cau bơto ơdŭ tơn jơh ờ gĭt sền sră tàm Hìu bơsram kấp 1 Trần Phú pà gĭt: jơh ală cau bơsram tàm ơdŭ is ồn do ndrờm là cau dờng sơnam lơm, là làng bol jơi bơtiàn dồ ết nă cau, gùt nam mìng kwèng mờ broă lơh sre lơh mìr. Cau pơgru pal nền nòn, jơh nùs ngan tàm broă bơto nàng cau bơsram in gĭt akhar, den gĭt sền akhar mờ gĭt tàm bơrlŭ akhar. Ùr pơgru Trương Thị Cúc, đơs: “Chờ hờp ngan tài bơh ală cau bơsram neh jơh nùs ngan lòt bơsram, khi kờñ ngan bơsram, khi kờñ gĭt uă ù tiah niam bơnĕ bơh Việt Nam dê tŭ cau pơgru bơto den ơm mŏ ngan nàng iăt. Ală cau bơsram sơnđàc ngan, ală cau bơsram tơn jơh bơta ờ gĭt sră uă ngan là hìu bơnhă rƀah, hìu bơnhă kal ke ngan den khi kơ̆p kờñ ngan gĭt akhar. Broă bơto pal tam cah is mờ uă cau, ală cau pơgru bòl rlau tŭ bơto mờ ală ơdŭ bè ờs”.

Bulah bè hơ̆,  jat ùr pơgru Phan Thị Tâm, cau geh uă nam bơto tơn jơh bơta ờ gĭt sră, tơngai bơh chờm dong làng bol gĭt sền sră, gĭt cih akhar den ƀuơn ngan, mơya tus tơngai tơnơ̆ ală cau lòt bơsram geh bơta tam gơl tài bơh uă jơnau gơbàn. Uă tŭ cau bơsram pal tus tơn tàm hìu nàng pơnđiang cau bơsram tus bơsram tàm ơdŭ:“Tus bơsram tơngai dơ̆ 2 cau bơsram gĭt wă là gĭt sền, gĭt cih den kơlôi là neh tơl rao tàng gơ jal lòt lơh broă tàm mìr, geh bàr pe nă cau tàm sơnam lơh broă den lòt lơh broă sa tàm Bình Dương den ală cau bơsram tàm ơdŭ ờ mù. Broă hòi jà cau bơsram kung gơtìp kal ke ngan sơl tài bơh khi lòt lơh broă rê jơla, den geh bàr pe nă cau bơsram rƀah ngan, ờ geh priă tuh xăng nàng lòt bơsram. Cau pơgru mut tơn hòi jà pà priă lơh niam wơl rơndeh, mut pơnđiang lòt bơsram, hòi jà mờ tơl broă lơh nàng cau bơsram in lòt bơsram tơl làm”.

 Lơh jat broă lơh tơn jơh bơta ờ gĭt sră tơngai bơh nam 2021 – 2025, kơnhoàl tiah nhàr lơgar Đức Cơ neh pờ 20 ơdŭ tơn jơh bơta ờ gĭt sră ai rlau 600 nă cau bơsram in. Đức Cơ neh tơnggơs mpồl sồr lơh tơn jơh bơta ờ gĭt sền sră tàm ală tiah, tàm jàu kơnòl broă ai ală cau tàm mpồl in jat tơl ù tiah ngan ngồn; lơh broă lơh jat sền, lòt sền, dong kờl ală tiah gam uă kal ke. Ồng Siu Luynh, Phó Củ tịc Anih duh broă Làng bol kơnhoàl Đức Cơ, đơs:“Tŭ làng bol gĭt sền sră, gĭt cih sră, broă mblàng yal gơwèt mờ làng bol ƀuơn rlau uă ngan, geh tŭ là broă sền gàr gơnoar kwơ di pal ngan bơh să tờm dê. Bơh sền sơwì den ală cau dờng sơnam gĭt sền sră, gĭt cih sră khi geh tai bơta chờ hờp, jơh hìu bơnhă bơsram bal, mè bèp, oh kòn, ồng mò bơsram bal. Bè đah gơnoar atbồ tiah do dê bol añ ƀuơn ngan yal bè broă tàm yal tơngĭt ală jơnau,ală rơndăp broă lơh tàm thôn, ƀòn, lơh ai làng bol in”.

 Ală ƀong đèng dềt tàm ơdŭ tơn jơh bơta ờ gĭt sră àng lơm pah mang, sòl àng ală bơta kơ̆p kờñ mờ bơta pin dờn tàm rài kis niam bơnĕ rlau tai ai làng bol jơi bơtiàn dồ ết nă cau in tàm kơnhoàl tiah nhàr lơgar Đức Cơ, càr Gia Lai dê.