Jăt rơndăp ù tiah geh ai lơh, gùng rơndeh ồs Lào Cai – Hà Nội – Hải Phòng jòng 417 kơi sồ, lòt gan 9 càr Lào Cai, yên Bái, Phú Thọ, Vĩnh Phúc, Hà Nội, Bắc Ninh, Hưng Yên, Hải Dương mờ Hải Phòng; tơrbŏ mờ anih ơhò ơm dà lềng ală lơgar Hải Phòng, tơrbŏ bal ală lơgar mờ lơgar Lo; di pal mờ jơnau kờñ pơn diang phan mờ bơta niam uă, mhar, ƀuơn mờ lơngăp lơngai.

Tơnơ̆ mờ tŭ iăt jơnau yal, Thủ tướng sồr Ƀộ Gùng lòt rê pơn diang phan mờ ală ƀộ, anih lơh broă gơrềng bal lơh mhar rơlao tai broă rơcang nàng yal rơndăp broă lơh, tàm nhai 1 nam 2025 pal yal Cíñ phủ in nàng tàm nhai 2 nam 2025 yal Quốk hội in bè gùng dà bơcri priă lơh mờ ală gùng dà broă lơh krơi is, lơyài ngan tàm nhai 12 nam 2025 pal mŭt lơh gơl gùng rơndeh ồs do. Thủ tướng sồr pơn jăt tai kơlôi sơnơng, sền wơl gùng lòt, ală anih rơndeh ồs ơm, bơta jờl lơh bơh rơndăp broă lơh mờ gùng geh song ngan, rềp ngan di lah gơtùi, ờ jăt gùng rơndeh ồs neh geh lài mờ lòt jăt gơl gùng pa; lơh wơl khà dơ̆ mờ tiah geh lơh ală anih rơndeh ồs ơm di pal.