Ala măt kwang đơng lam Đảng, Dà lơgar, Thủ tướng ồng Phạm Minh Chính pơyoa jơnau chờ gờm Noel lơngăp lơngai, niam bơnĕ, gơboh gơbài tus ală bèp yàng, cau pơgru bal mờ làng bol jăt yàng Bàp tàm Hìu yàng Bàp Lào Cai.

Thủ tướng đơs sùm Đảng, Dà lơgar kơ̆p kờñ Hìu yàng Bàp, Bèp yàng, cau jăt yàng, cau pơgru bơto jơnau yàng, cau bơsram gùng yàng pơn jăt tai “Duh khoai yàng kờñ gơboh dà lơgar”, “Kis niam rài kis sàng goh gùng yàng”, Gùng yàng gơrềng bal mờ jơi bơtiàn, pơgồp bal niam tàm broă bơtàu tơnguh dà lơgar mờ ai bơta git gơ̆p đah lơgar Việt Nam mờ Hìu yàng Vatican ngai sơlơ niam bơnĕ. Thủ tướng đơs sùm, Đảng, Dà lơgar Việt Nam sùm lài kung bè tơnơ̆ lơh jăt broă gàr niam gơnoar khăt gơboh pin dờn, jăt yàng bơh làng bol dê, git jơnau bal mờ ai tơl bơta ƀuơn nàng ală cau kung bè ală gah jăt yàng in lơh broă, tus bal bơ̆t bơtàu, sền gàr Dà lơgar. Thủ tướng sồr kấp ủy, gơnoar atbồ ală kấp tàm càr Lào Cai mờ ală càr, ƀòn dờng tàm gùt lơgar bal mờ Mpồl Jăt yàng Cíñ phủ dê sùm lơh jăt, sền tus tàm ală tiah kal ke nàng di tŭ dong kờl làng bol, drơng gàr, gàr niam ai làng bol in geh dờp dùl kàl Noel lơngăp lơngai.