Drim ngai 26/3, Thủ tướng ồng Phạm Minh Chính mờ Mpồl ala mat kwang bàng kấp dờng lơgar Việt Nam neh rê tus Hà Nội, tơn jơh niam bơnĕ dơ̆ lòt còp ngan ngồn lơgar Nga mờ broă lơh lơh broă uă ngan mờr 30 broă lơh tàm 3 ngai. Bơh ală dơ̆ cribơyai kấp dờng, tìp mat kấp dờng mờ đơng lam bồ kấp dờng lơgar Nga, 2 gah lơh geh bơta ring bal uă bè broă pơn jat tai lơh jrô ơnàng làm uă rlau tai bơta pin dờn cíñ trị, sơlơ tơnguh tai gĭt wă bal mờ gơ̆p tàm tơngume gĭt gơ̆p lơh bơyô bal ờs mờng bơh yau.

Bơta tờm kwơ màng bơh dơ̆ lòt còp dê là broă Thủ tướng ồng Phạm Minh Chính mờ Thủ tướng lơgar Nga ồng Mikhail Mishustin sền bal dơ̆ kĭ Jơnau kĭ hơ lơh broă bal bơt bơtàu Hìu măi đèng hạt ñân tàm lơgar Việt Nam. Do geh sền là broă lơh tờm cèng gơtha kah yau, lơh tềl broă sơnđờm mut lơh broă lơh đèng hạt ñân dà lơgar, pờ geh gùng dà lơh broă bal pa tàm gah năng lượng kwơ màng. Dơ̆ lòt còp lơh geh uă cồng nha ngan ngồn, pơgồp bơnah gĭt nền wơl mờ tơnguh gơnoar bơta gĭt gơ̆p tam klăc lơh broă bal kwơ màng tơl làm Việt Nam mờ Nga tàm tơngai pa.