Càr Lâm Đồng neh sơn đờm lơh Rơndap broă lơh Anih tờm pơlam tàp tàp pràn să jan Dà lơgar tàm Dà Làc. Rơndap broă lơh bơh Ƀộ Niam chài, Tàp pràn să jan mờ Lòt nhơl lơh cau tờm bơcri priă lơh, geh lơh tàm bă ù ơnàng rlau 10 lồ tàm sơnah ƀòn Langbiang – Dà Làc, kờp jơh priă bơcri lơh mờr 300 tơmàn đong. 

Rơndap broă lơh geh 3 tiah tờm: B1, B2 mờ B3. Tàm hơ̆, tiah B3 pa sơn đờm lam lơh geh bă ù mờr 3,5 lồ geh sơntèk re dà geh rơkàng jơm, tiah tàp golf. Tiah B2 ơnàng rlau 3,7 lồ, geh hìu tàm pơrlòng uă bơta neh geh lam lơh tàm nhai 10 nam 2023 mờ kờp dŭ lơh gơs tàm lồi nam do. Tiah B1 geh bơceh lơh nàng lơh hìu ơm ai cau pơlam tàp, cau geh jơnau git wă jrô mờ cau pơrlòng in bal mờ ală anih dong kờl, kờp dŭ sơn đờm lam lơh tàm lồi nam 2026. Broă lơh do geh bơcri priă lơh jat broă lơh pa ngan mờ ndrờm bal, gàr tơl ală bơta pal geh jat jơnau sồr dà lơgar mờ ală lơgar dê. Broă lơh drơng ai broă pơlam tàp, pơrlòng tàp pràn să jan geh cồng nha uă mờ lơh gơ rề srơh tàp pràn să jan tàm làng bol, pơgồp bal mờ bơtàu tơnguh lòt nhơl mờ niam chài, tă pơgồp tàm gơguh lơh sa mpồl bơtiàn bơh dà lơgar dê đơs bal, bơh càr Lâm Đồng mờ tiah do dê đơs is.