Cồng nha jat sền broă bơsong jơnau dan, jơnau đơs bơh cau tĕ khà dê pơyua tus pơrjum dơ̆ 9, Quôk hội khoă XV; cồng nha wă làng bol, bơsong sră yal yă mờ bơsong jơnau yal yă, yal khài bơh làng bol dê nam 2025. Dùl tàm ală tơngume geh ală cau ala mat Quôk hội sền gròi là ală broă lơh tam gơl pràn nàng rơcang dră wơl sa kuề sa kuà geh cồng nha rlau tàm tơngai tus. 

Ală cau ala mat đơs, nam 2025, broă lơh rơcang dră wơl sa kuề sa kuà neh lơh geh ală cồng nha niam ngan. Broă git gŏ, lơh glài broă sa kuề sa kuà, bơta ờ niam bơh broă lơh lùp sền, sền sơ wì, gròi sền ală cơng tàng bè jơnau yal priă jền pơn jat tai geh lơh pràn. Broă lơh lùp khàu, lah yă, cah rơña ală tìs sa kuề sa kuà sền bal geh lơh di jơnau cih bơh adat boh lam dê. Uă tìs sa kuề sa kuà dờng, lơh gơbàn jơnau gơ lời wơl kơn jơ̆ pơn jat tai gơtìp lơh glài; broă lơh tìs bơh uă kwang bàng, cau lơh broă sa priă nhai dà lơgar dê, tàm hơ̆ geh bal mờ đơng lam gơ wèt Ƀộ Cíñ trị, Mpồl đơng lam Đảng atbồ geh lơh loh. Broă lơh ai wơl priă jền, phan bơna sa kuề sa kuà tàm tŭ tơngai lùp khàu lơh geh cồng nha niam ngan. Ală cau ala mat sồr pơn jat tai lam lơh ală broă lơh sơlơ gròi sền gơnoar broă, rơcang dră wơl sa kuề sa kuà bơh gờñ, bơh ngài.