Jat ală cau ala mat, tơngai lơh broă Pơrjum dờng dơ̆ XIII, Mpồl duh broă Đảng dà lơgar, Ƀộ Cíñ trị, Mpồl đơng lam Đảng dà lơgar sùm kơ̆ dơn, tam klac bal, ring bal, gàr kơ̆ jơnau pal jat, lơh jat gùg dà, broă lơh, đơng lam dà lơgar sơrlèt gan tơl bơta kal ke, bơta lòng, gơtùi lơh gơs ală jơnau kờñ lơh geh, kơnòl mờ Jơnau lơh nền tàm pơrjum dờng dơ̆ XIII bơh Đảng dê neh ai tơlik, tàm hơ̆ geh uă kơnòl broă lơh gơs jak ngan. Cribơyai tàm jơnum, Thủ tướng ồng Phạm Minh Chính đơs sùm jơnau bơsram mờng chài tam klac bal: “Broă lài ngan là tam klac bal. Ờ geh tam klac den mbè gơtùi geh ngai do. Bol he kơ̆ dơn tam klac bal tàm dơlam is mpồl, tam klac ală lơgar hơ̆ sồng bol he gơtùi geh bơngă pin dờn, hơ̆ sồng gơtùi geh jơnau đơs, gơnoar broă. Hơ̆ là bơta tờm ngan. Mblàng lơh loh tàm do ờ mìng ai jơh gùt Đảng in mờ tàm jơh bal anih lơh broă, mpồl lơh broă tàm ƀòn lơgar in git loh nùs nhơm tam klac bal. Tam klac pal wă wờng bal mờ gơp, tam pà bal, geh tŭ là pal phi să tơn”.

Ală jơnau đơs đơs sùm pơn jat tai git wă jrô ơnàng broă rơndap lơh rài pa mờ lơh ngan lơh gơtùi jơnau kờñ 100 nam mờ Jơnau lơh nền tàm Pơrjum dờng dơ̆ XIII bơh Đảng dê neh git nền: Jơnau kờñ tềng đap mat nam 2030 tơngkah kir sơnrai 100 nam ngai tơng gơs Đảng mờ gơ gơs là dùl lơgar gam bơtàu tơnguh lơh sa mờ măi mok pa ngan, priă lơh geh di mơ uă. Nam 2045, tơngkah 100 nam Ngai tơng gơs dà lơgar, gơ gơs là lơgar sàh hội củ nghiã bơtàu tơnguh geh priă jền lơh geh uă. Nàng lơh gơtùi jơnau kờñ do, cau ala mat ồng Đỗ Tiến Sỹ, Mpồl cau ala mat Đảng ƀộ Cíñ phủ geh jơnau dan: “Digơlan kờñ pal lòt jrô tàm bơta tam gơl pràn ngui jak chài măi mok, tam gơl pa bơceh lơh mờ tam gơl sồ dà lơgar mờ dilah kờñ bè hơ̆ den kung bè jơnau đơs bơh Tổng Ƀí thư dê là pal tam gơl pràn tơngume lam lơh jat Jơnau lơh nền tàm pơrjum dờng dơ̆ XIV, tam gơl pràn pơn drờm mờ Pơrjum dờng lài do, đơs loh tơngume, broă rơndap lơh gơs nàng lam lơh jat Jơnau lơh nền tàm Pơrjum dờng dơ̆ XIV. Bol hi gŏ là tơngume tam gơl pràn bơtàu tơnguh jak chài măi mok, tam gơl pa bơceh lơh mờ tam gơl sồ dà lơgar geh gơ rềng tus mpồl lơh gơlik phan, bơta gơ rềng đah lơh gơlik mờ gùng dà nàng lơh gơs dùl bơta gơn kơnờm pa, bơta pràn chồl tơnguh pa tàm rài lơh sa. Tàm tŭ tơngai pa den pal tam gơl pràn bơtàu tơnguh jak chài măi mok, tam gơl pa bơceh lơh, tam gơl sồ dà lơgar”.

Jat cau ala mat ồng Trần Phước Sơn, Mpồl Đảng ƀộ ƀòn dờng Đà Nẵng den nàng kờñ lơh geh ală jơnau kờñ bè lơh sa ai tơlik tus nam 2030, broă rơndap lơh tus nam 2045 kờñ pal tơng gơs broă lơh gơguh lơh sa pa, rơndap tap sèng wơl rài lơh sa, lơh pràn ngui măi mok pa, tam gơl pa, ai jak chài măi mok, tam gơl pa bơceh lơh mờ tam gơl sồ lơh bơta gơn kơnờm: “Sồr lơh loh jơnau pơrya mờ rơndap tap sèng bơh broă lơh gơguh lơh sa pa dê. Do là broă lơh gơguh lơh sa tơrgùm bal, pơgồp bal bơnĕ bơnài đah lơh gơlik phan mờ jơnau kờñ blơi, jat tàm tam gơl pa bơceh lơh, jak chài măi mok, kơrnuat boh lam, cau lơh broă geh bơta niam uă mờ lơh sa sồ. Dơ̆ 2 là git nền 3 gah tờm rơndap tap sèng wơl rài lơh sa hơ̆ là rơndap tap sèng gah broă lơh jat gùng dà ngui măi mok, lơh pa tơlir mờ tam gơl sồ. Rơndap tap sèng kơnhoàl ù tiah bơtàu tơnguh jat gah gơguh lơh sa, gùng kềng lơh sa mờ lơh sa dà lềng. Rơndap tap sèng kơrnuat boh lam mpồl lơh sa kă bro, cau lơh broă nàng kờñ tơnguh cồng nha lơh geh mờ bơta pràn tàm pơrlòng”.

Ală cau ala mat đơs, dơ̆ sơn rờp Broă lam lơh geh ơn tàm rơndap tap sèng bơh Sră nggal Pơrjum dờng dê tơn. Bơta do ai gŏ bơta lơh ngan ờ mìng ơm wơl tàm broă rơndap lơh, ai tơlik gùng dà broă lơh mờ pal gơ gơs là bơta tàm pơn jat rài kis pràn ngan bơh mpồl bơtiàn dê. Tơngume lơh broă là broă nàng lam lơh ngan ngồn bơta kơp kơnờm bơtàu tơnguh. Cau ala mat ồng Phan Văn Mãi, mpồl cau ala mat Đảng ƀộ Quôk hội sồr: “Añ sồr pal bơt bơtàu broă rơndap lơh bơtàu tơnguh tiah lơh sa kuơmàng dà lơgar dê, tàm hơ̆ tơrgùm ai 2 tiah lơh sa tờm tàm tiah đah tô mờ tiah đah jum dà lơgar in. Tài bơta pràn, bơta ƀuơn bơh 2 tiah do dê dờng ngan. Tŭ lơh sa jat jơnau đơs tàm sră pơ àr, pơrya bơh lơh sa dờng dê den tiah do geh tàm tơrbŏ bal nàng lơh geh bơta ndrờm pal den rơp gơtùi lơh geh priă jền, gơguh lơh sa. Dilah 2 tiah geh dùl broă rơndap lơh bơtàu tơnguh dipal den ngan là rơp chồl tơnguh bơtàu tơnguh dà lơgar”.

Ală jơnau đơs tàm jơnum cribơyai kung ring bal wèt tus bơt bơtàu mpồl bơtiàn niam bơnĕ, duh rơngòt adat boh lam, gơguh jak, lơngăp lơngai mờ bơtàu tơnguh. Bơta tờm lài ngan là gàr kơ̆ bơta duh rơngòt adat boh lam tàm mpồl bơtiàn mờ broă lài ngan ki ngàm adat boh lam, tam gơl wơl sră pơ àr gơnoar atbồ; rơcang kơryan sa kuề sa kuà, pơhì pơhà, broă ờ niam; bơt bơtàu mpồl kwang bàng “song ring, jơh nùs, khin sơnơng, khin lơh, khin kong kơnòl” nàng adat boh lam dà lơgar dê gơ jat bal mờ bơta kơp kờñ làng bol dê.