Tơnơ̆ mờ tơngai jŏ jòng ơm ing, ală rơndăp broă lơh đèng hạt ñân Ninh Thuận 1 mờ 2 gam geh lơh wơl tàm tiah đah jum càr Khánh Hoà. Broă tơm ntrờn ù tiah neh geh lơh, tiah ƀòn ơm kis gam geh bơcri priă lơh, làng bol neh ring bal, tŭ lơi kung rơcang jào ù nàng lơh rơndăp broă do. Mơya, tơnơ̆ mờ rơlao 15 nam, 2 rơndăp broă lơh gơtìp ơm ing, uă gơnoar kwơ bơh làng bol tàm tiah do gơtìp gơrềng bal. ù tiah gơtìp “lời gời”, làng bol ờ gơtùi bơcri priă lơh jŏ jòng. Broă tơm bơtơl ờ hềt lơh di mờ bơta kwơ lơh sa pa dê. Ồng Tu Thanh Hường, tàm sàh Phước Dinh pà git, làng bol neh tam gơl bơh ù bràs tus mờ ròng ka ti, ròng kwăt geh cồng nha lơh sa uă. Tŭ toh wơl ù nàng lơh rơndăp broă, jơnau bè rài kis lơh broă sa geh ai lài gơwèt mờ làng bol in: “Hìu añ gơtìp toh di pơgăp 2 lồ ù, gam ròng kwăt mờ ròng ka ti. Priă ròng phan tŭ do kas ngan. Geh ờ uă làng bol lời ù nàng lơh rơndăp broă in, pal lik bơdìh blơi ù mờ priă gơguh tus 15 tơmàn đong tàm tơl lồ ù”.

Ờ mìng jơnau rài kis broă lơh sa, bơta bè phan bơna kung là bơta sền gròi uă ngan bơh làng bol tàm tiah lơh rơndăp broă do dê. Tàm tiah ƀòn Vĩnh Trường, tiah tờm bơh rơndăp broă lơh tàm sà Phước Dinh dê, uă gơl gùng dềt, ờ niam, gơrềng tus mờ rài kis bal mờ broă bơtàu tơnguh lơh sa. Mò Nguyễn Thị Thanh, tàm thôn Vĩnh Trường pà git tŭ ntrờn tus tàm ƀòn ơm kis pa, làng bol kơ̆p kờñ geh phan bơna ndrờm bal, ƀuơn rơlao: “Làng bol tàm Vĩnh Trường lài do gùng ờ dờng, kal ke uă ngan. Lơh hìu kung pal pơn diang ờ uă hơ̆ sồng gơtùi lòt gan tàm gùng dềt, ờ ƀuơn bè ală tiah ndai. Añ kơ̆p kờñ tus tàm ƀòn pa pal ƀuơn rơlao, gùng pal ơnàng”.

Tềng đăp mờ bơta mùl màl do, jơnau sồr geh ai là pal lơh wơl kơrnoăt nàng di pal mờ mùl màl. Jơnau lơh nền sồ 189 nam 2025 bơh Quốk hội dê bè ờ uă kơrnoăt, broă lơh krơi is nàng bơcri priă lơh Rơndăp broă lơh ồs đèng hạt ñân Ninh Thuận neh pờ geh adăt boh lam mờ ală kơrnoăt krơi is. Mơya, ală broă lơh do kung gam geh pơn jăt tai sền wơl, lơh wơl, bơtơl tai nàng bơsong ală gơkòl mùl màl tàm ƀòn lơgar in, ờ hoan hoàc huơr ai làng bol in tài rơndăp broă lơh geh lơh jŏ ir.

Ờ kơ̆p tus mờ kơrnoăt lơh gơs, càr Khánh Hoà gam sồr 2 sàh Vĩnh Trường mờ Phước Dinh rơcang lơh broă tơm ntrờn, dong kờl, lơh ƀòn ơm kis pa. Tus tŭ do, broă tơm ntrờm, lơh ƀòn ơm kis pa geh geh cồng nha lài ngan. Rơndăp broă lơh Ninh Thuận 1 toh geh di pơgăp 450 lồ, neh kĭ tơm bơtơl ai rơlao 150 nă cau in, priă tă rơlao 168 tơmàn đong. Ƀòn ơm kis pa ơnàng rơlao 65 lồ neh lơh gơs gùng dà broă lơh. Rơndăp broă Ninh Thuận 2 toh geh di pơgăp 320 lồ ù, neh kờp rơlao 530 hìu, rơlao 100 hìu neh geh tơm ing lài. Ồng Nguyễn Văn Nhựt, Kwang lam bồ Sờh Lơh sa mờ măi mok Kă bro phan càr Khánh Hoà pà git: “Tàm 2 sàh, Anih duh broă Làng bol càr neh sồr lơh mhar broă tơm ntrờn ù tiah, tàm nùs nhơm ngui priă bơh Jơnau lơh nền 189 tŭ do dê, mờ ngui gùng dà broă lơh di pal. Tŭ Quốk hội tơlik mùl màl broă lơh wơl, bơtơl Jơnau lơh nề, càr geh tơngu me nàng lơh mhar”.

Mùl màl pà gŏ, bàr rơndăp broă lơh ồs đèng hạ ñân ờ mìng geh bơta kwơ bè tơl năng lượng dà lơgar, pơgồp bal tàm broă gàr tơl ồs đèng, jŏ jòng ai broă bơtàu tơnguh dà lơgar in, mờ gam pờ geh dơ̆ niam nàng lơh gơs tiah gơguh lơh sa pa tàm Đah jum Tàm gùl lơgar. Mờ bơta krơi is là ồs đèng geh bơta pràn dờng, bơta tơlik nhơm ƀơ̆ ờ uă, ală hìu măi rơ̆p pơgồp bal lơh geh uă bơta geh, tơrmù gơrềng tàm năng lượng geh lơh bơh lŭ, tơnguh nùs nhơm lơh tờm bơh mpồl ồs đèng dê.

Tàm bơta càr dê, mờ bơta kwơ jăt gah dà lềng, phan bơna ngai sơlơ geh lơh gơs, tiah do geh tơl bơta nàng bơtàu tơnguh mờ lơh sa dà lềng, lòt nhơl, broă lơh drơng ala mờ lơh sa mờ măi mok năng lượng. Ồng Nghiêm Xuân Thành, Ƀí thư Tỉñ uỷ càr Khánh Hoà pà git, nàng ală bơta pràn geh gơs mùl màl, broă bơsong di tŭ ală gơkòl bè broă lơh, gàr niam gơnoar kwơ làng bol in mờ rơcang ndrờm bal ală bơta nàng bơtàu tơnguh kung gam là bơta tờm ngan. “Càr pal sền gròi ngan tus mờ rài kis broă lơh broă sa jŏ jòng ai làng bol tàm tiah gơtìp toh ù in; rơcang kơlôi sơnơng, dờp bồ bơta niam broă lơh drơng ala bơh rơndăp broă lơh nàng wèt broă lơh, dong kờl bơto bơtê, ai lơh broă. Ală gah bè ơm kis, sào sa, nhơl chờ pơrài bồ tơngoh, bal mờ bơtàu tơnguh phan geh lơh bơh broă lơh sa suơn sre, phan tàm dà… ndrờm pal geh rơcang tơl ndrờm bal. Kờñ hòi jà geh bơta pràn, lòt di gùng pal geh rơndăp broă lơh”.

Broă ring bal neh geh, ù tiah gam rề ơnàng, bơta gam tai là kơrnoăt boh lam pal jăt bàn mờ mùl màl. Tŭ ală “tiah gơkòl” geh tă bơsong di tŭ, bàr rơndăp broă lơh ồs đèng hạt ñân rơ̆p ờ mìng lơh gơs di mờ tơngai geh ai, mờ gam ai geh bơta pràn bơtàu tơnguh jŏ jòng ai càr Khánh Hoà bal mờ tiah Đah jum tàm gùl lơgar in.