Jăt jơnau yal, càr Lâm Đồng tŭ do geh 2 rơbô 938 rơndăp broă bơcri priă gam geh lơh, kờp jơh priă dan rơlao 2 tơlăk 100 rơbô tơmàn đong. Bơh tàm broă sền wơl, geh tus 359 rơndăp broă lơh gơtìp kal ke, gơkòl mờ kờp jơh priă rơlao 245 rơbô tơmàn đong. Mơya, tus tŭ do mìng rơ̆p bơsong jơh 22 rơndăp broă tàm khà 359 rơndăp broă. Ală gơkòl mìng tơrgùm tàm broă gơtìp tàm bơrlŭ rơndăp ù tiah bơ̆t bơtàu – brê bơnơm – phan kwơ geh is tàm ù; sră nggal tam gơl jơnau kờñ ngui ù, brê; lơyài tàm broă tơm ntrờn ù tiah; jơh tơngai bơcri priă tài tơngai bơsong sră nggal jŏ ir; dồs kơnòl broă priă jền. Ồng Phạm Dũng, Củ tịc Mpồl duh broă Atbồ broă lơh Kông ty Bơcri priă năng lượng Ồs đèng dà Cam Ly pà git, mpồl lơh sa kă bro gam bơcri 10 rơndăp broă lơh tàm càr Lâm Đồng.

Bơdìh mờ kal ke bal, mpồl lơh sa kă bro gam gơkòl sră nggal tŭ tam gơl kấp, mpồl geh gơnoar nàng bơsong sră nggal. “Tài gùng dà  broă lơh pa pa do jàu kâp kơnòl ai sơnah ƀòn in, bŭ lah oh mi tàm kấp sơnah ƀòn kung kờñ bal sơl, lơh jăt pràn, mơya tài pa ir den tàng broă lơh gam gơtìp lơyài, neh rơlao 2, 3 nhai mơya kung gam ờ hềt gơtùi bơsong gơs. Tus tàm tŭ rơcang bơsong, rơcang kĭ den tàm ngai 31 nhai 1 lài do tam gơl tai gơnoar lơh broă, den tàng pơn jăt tai gơtìp gơkòl”.

Mùl màl pà gŏ, uă rơndăp broă lơh roh uă ngan tơngai mìng kờñ lơh gơs ală broă lơh wơl, bơtơl sră nggal tài tam gơl di jăt mờ jơnau geh ai ha là mpồl geh gơnoar bơsong broă. Tŭ sră nggal mờr lơh gơs den broă lơh gơtìp tam gơl tai, sră nggal pal lơh wơl bơh sơnrờp, lơh broă bơcri priă gơtìp “hoàc huơr” tàm sră pơ-àr. Ồng Hồ Văn Mười, Kwang geh jơng tàm Đảng Dà lơgar, Củ tịc Anih duh broă Làng bol càr Lâm Đồng pà git, càr neh lơh geh 6 mpồl lơh broă geh 6 Phó Củ tịc Anih duh broă Làng bol càr lơh Cau lam bồ, tus sền tơn, sền nàng git tơl rơndăp broă lơh. Càr gam rơhời đal git mờ bơsong kal ke ai tơl mpồl rơndăp broă in. “Tŭ do neh đal gŏ, neh sền gŏ loh làng bloh, broă là tus do là pal tơrgùm bơsong. Ală kal ke, gơkòl do bŭ lah bè lơi, di gơlan geh gơtìp tàm 5 nam ha là 10 nam, geh tŭ 15 nam bloh, mơya he rơ̆p lơh rơhời, broă ƀuơn lơh lài broă kal ke lơh tơnơ̆, broă lơi lơh lài den pal lơh lài, ờ hềt kờñ kung pal lơh mơya lơh tơnơ̆. Ală gah mpồl lơh broă, ală sàh sơnah ƀòn lơh bè lơi jòi geh săp đơs niam ngan, geh cồng nha ngan, jòi geh gùng dà broă lơh nàng bơsong ală kal ke ai ală mpồl lơh sa kă bro tàm tơngai gờñ ngan in”.

Càr Lâm Đồng ai jơnau kờñ gơguh lơh sa nam do bơh 10 tus 15%, broă bơsong 359 rơndăp broă lơh mờ rơlao 245 rơbô tơmàn đong priă bơcri gam gơkòl geh sền là kơnòl bơsong jal mhar. Ồng Y Thanh Hà Niê Kdăm, Kwang geh jơng tàm Đảng Dà lơgar, Ƀí thư Tỉñ ủy, Kwang lam bồ Mpồl cau ala măt Quốk hội càr Lâm Đồng đơs là, jơnau kờñ ờ di là bơsong tơl pang sră krơi is mờ pal lơh gơs jơh broă lơh, tơrmù tơngai bơsong, gàr kơl jăp mờ ring bal mờ tam gơl bè gơnoar – nàng bơta pràn gờñ tam gơl gơs gơguh lơh sa mùl màl. “Bal mờ broă bơsong sră nggal, càr gàr kơ̆ nùs rơndăp broă lơh pal lơh di adăt boh lam, di jơnau hơ, gàr geh cồng nha broă ngui ù, cồng nha bơcri priă mờ lơh ndrờm bal bơta kwơ Dà lơgar, mpồl lơh sa kă bro bal mờ làng bol. Càr jờng rơ cau bơcri priă lơh nền nòn, lơh ngan, mờ lơh ngan bơsong ală cau lơh lơyài mờ tơngai geh ai, lơyài lơh, jŏ tơngai, lơh gơtìp hoàc huơr bè priă”.

Pa do, Phó Thủ tướng Duh broă sùm Cíñ phủ ồng Nguyễn Hoà Bình kung neh geh dơ̆ lơh broă mờ càr Lâm Đồng nàng bơsong kal ke, gơkòl ală rơndăp broă lơh mờ càr Lâm Đồng nàng bơsong kal ke gơkòl ală rơndăp broă lơh tàm càr do. tàm dơ̆ lơh broă, càr Lâm Đồng dan Dà lơgar sền wơl, pơgồp jơnau đơs nàng bơsong 27 rơndăp broă lơh tờm. Bơnah uă rơndăp broă geh ring bal bơh uă tơngai lài, tŭ do gơtìp gơkòl tàm broă tam gơl broă lơh bè ù tiah, cok khà priă, lơh wơl rơndăp ù tiah mờ gơwèt broă pal bơsong di jăt mờ jơnau đơs pơn dut bơh broă lùp sền, kơrnoăt tam gơl pơn jăt tai ală jơnau lơh nền pa bơh Quốk hội dê. Sồr lơh tàm dơ̆ lơh broă, Phó Thủ tướng Duh broă sùm Cíñ phủ ồng Nguyễn Hoà Bình đơs nền, ală rơndăp broă lơh lơyài tàm broă ai ngui gam lơh gơtìp hoàc huơr uă ngan, lơh ờ pràn priă geh bơh mpồl lơh sa kă bro mờ càr dê.

Ồng sồr càr bơsong jơh ală rơndăp broă gơwèt gơnoar; mờ ală rơndăp broă gam gơkòl, pal yal tơl mờ Mpồl Sồr lơh nàng sền wơl, bơsong di jăt jơnau geh ai. Đơs nền kơrnoăt bơsong, Phó Thủ tướng Duh broă sùm Cíñ phủ ồng Nguyễn Hoà Bình đơs loh: “Lơh ală rơndăp broă lơh, ală oh mi yal geh uă ngan broă bơsong jăt Jơnau lơh nền tàm pơrjum sồ 170 mờ 265 bơh Quốk hội dê, mơya pal tơl bàr bơta. Lài ngan, neh geh lùp sền, sền gròi mờ geh jơnau đơs pơn dŭt loh làng gơtìp tìs ha là ờ; di lah tìs den pal lơh glài kwang bàng. Dơ̆ bàr, rơndăp broă lơh pal geh tàm khà măt geh Cíñ phủ cih jăt jơnau kờñ bơh Ƀộ cíñ trị bal mờ Quốk hội dê. Kờñ mŭt tàm khà măt den pal yal bơh tàm geh cih jơnau 751, khà geh ai pal geh tơl, drờm bal”.

Tàm nùs nhơm lơh broă bal mờ càr dê, jơnau sồr bơh Cíñ phủ tàm dơ̆ lơh broă mờ càr Lâm Đồng dùl dơ̆ tai ai tơngŏ broă lơh ngan bơsong ală tiah gơkòl bè kơrnoăt, bơsong bơta pràn mơya kung gam gàr di mờ kơrnoăt git mờ lơh jăt adăt boh lam, ờ lơh gơtìp tìs, ờ lời gơtìp hoàc huơr phan bơna Dà lơgar. Hơ̆ kung là broă lơh mùl màl, lơh jăt jơh tàm gùng dà broă lơh pràn kơl dang, ai geh tiah bơcri priă loh làng, kơl jăp, nàng càr Lâm Đồng pin dờn tơnguh pràn, bơtàu tơnguh mhar mờ kơl jăp tàm rài brồ să bơh dà lơgar dê.