Do là pơrjum dŭt ndơl bơh tơngai lơh broă Quôk hội khoă 15 dê. Pơrjum dơ̆ do neh lơh dùl mpồl broă lơh dờng ngan, tă bơsong uă bơta “gơkòl” bè kơrnoat boh lam, lơh geh ală bơta adat boh lam drơng broă bơtàu tơnguh tơngai bơh nam 2025-2030. Hơ̆ là jơnau đơs bơh uă cau ala mat dê kềng gah bơdìh Quôk hội.

Tàm tơngai bơta tàm lơgar mờ tàm dunia geh uă tam gơl, Quôk hội khoă 15 neh tơngŏ bơta khin cha, gàr niam sùm mờ đơs nền kơnòl tờm tàm broă lơh sir kơrnoat boh lam mờ jơnau kờñ bơceh lơh nàng bơtàu tơnguh; sùm yờ tơnguh uă broă lơh jat sền nàng ai ală jơnau lơh nền cèng bơta jŏ jòng gơwèt mờ bơta bơtàu tơnguh bơh Dà lơgar dê. Pơrjum dơ̆ do neh lơh dùl ròt adat boh lam cèng ală bơta tờm ngan dong ai Cíñ phủ tơngai lơh broă tus ƀuơn ƀoài rlau tai tàm broă lơh jat jơnau kờñ gơguh lơh sa mờ jơnau kờñ bơtàu tơnguh Dà lơgar.