Tàm càr Gia Lai, Anih duh broă Làng bol càr do pa lơh jăt ală kơnòl broă jal mhar nam 2026, tàm hơ̆ ai broă bơcri priă lơh phan bơna bơtơ̆t rơbòng dà là dùl tàm ală kơnòl broă tờm bơh gah lơh sa suơn sre, ƀòn lơgar dê. Pe broă lơh bơtơ̆t rơbòng dà dờng mờ kờp jơh priă bơcri lơh di pơgăp 810 tơmàn đong rơ̆p geh lơh tàm tơngai bơh nam 2026 tus 2030 nàng bơsong jơnau kờñ dà lơh sa mờ ngui sa ai tiah đah măt tơngai Mŭt càr in, do là tiah gam uă bă ù bơtàu tơnguh lơh sa suơn sre mơya phan bơna bơtơ̆t rơbòng dà ờ hềt di pal mờ jơnau kờñ.

Jăt broă rơndăp lơh geh ai, broă lơh bơtơ̆t rơbòng dà Djang tàm sàh Kbang lơh geh tơl broă tuh dà tus 800 lồ ù lơh sa suơn sre mờ ai dà ngui sa di pơgăp 3 rơbô 500 nă cau in. Tơnao dơng dà Ka Tung tàm sàh Tơ Tung drơng broă tuh dà ai 1 rơbô lồ ù lơh sa mờ ai dà ngui sa rơlao 2 rơbô 600 hìu làng bol in. Tơnao dơng dà Đăk Trau Dle tàm sàh Kon Chiêng tuh tơl ai 600 lồ ù lơh sa mờ pơgồp bal tàm broă kơrian dà tih dà cò. Ồng Cao Thanh Thương, Kwang Lam bồ Sờh Broă lơh sa suơn sre mờ Tiah ơm kis càr Gia Lai pà git: “Khà tuh dà rơcang lài ai ù lơh sa suơn sre tiah đah măt tơngai Mŭt càr Gia Lai geh rơlao 12%, den tàng nàng tơnguh geh bơta kwơ do, lơh gơs tiah tam phan dờng càr in bal mờ tiah do, den pal tơrgùm bơcri priă lơh phan bơna bơtơ̆t rơbòng dà. Tàm Jơnau lơh nền tàm pơrjum Dờng Đảng bộ càr Gia Lai tơngai lơh broă bơh nam 2025 tus 2030 tơrgùm sền wơl bơcri priă lơh phan bơna bơtơ̆t rơbòng dà nàng ngui jơh bơta geh bè bă ù drơng tàm broă bơtàu tơnguh lơh sa suơn sre, tàm hơ̆ uă ngan là tàm broă tam phan nàng drơng lơh gơs phan nền nòn mờ tăc mờ lơgar bơdìh”.

Tàm tŭ càr Gia Lai tơrgùm bơcri priă lơh ală broă lơh prăp dà nàng rơcang geh tơl dà jŏ jòng den càr Dăk Lăk, broă rơcang kơrian mờ trồ tiah lơh aniai gam geh jal mhar lơh tềng đăp mờ ală jơnau yal lài bè trồ tiah gơtìp ni sơna tàm kàl mìu càl dờng. Bơh bồ nam 2026 tus tŭ do, càr Dăk Lăk neh gơtìp 9 dơ̆ rềs àr bơh trồ tiah, tàm hơ̆ geh mìu sơr, càl pồt mờ kơnàs còng, lơh 1 nă cau gơtìp chơ̆t, 85 nơm hìu gơtìp tơrlah, kờp jơh hoàc huơr di pơgăp 2 tơmàn 860 tơlăk đong.

Mŭt tàm kàl mìu, gùt càr geh rơlao 80 tiah gơtìp tơrlah ù, tàm hơ̆ 12 tiah geh sền là ngòt rơngơ̆t ngan pal geh bơsong jal mhar. Pah kah ngan, bŭ lah mŭt tàm kàl mìu dờng, bơta di gơlan ờ tơl dà kung gam geh ală gah lơh broă geh gơnoar yal lài tài mpồl bơtơ̆t rơbòng dà tŭ do mìng rơ̆p di pal mờ broă tuh dà di pơgăp 23% bă ù lơh sa suơn sre in, bơnah uă bă ù gam tai kung gam gơrềng tàm dà geh is bơh trồ tiah dê. Ồng Nguyễn Thiên Văn, Phó Chủ tịc Anih duh broă Làng bol càr Dăk Lăk sồr: “Gơwèt mờ ală sờh, gah lơh broă, ală sàh sơnah ƀòn gơrềng bal bơh jơnau yal lài, rơcang lài lơh broă rơndăp lơh, yal tơngit mblàng jơnau tus mờ làng bol, rơcang lài phan lơh broă, cau lơh broă, jơh ală bơta pal geh tus tơl gah broă, tơl mpồl lơh broă nàng tơrgùm bal jơh ală mpồl do tàm dùl tiah pal geh nùs nhơm ring bal, geh kơrnoăt tàm broă đơng lam, lam lơh. Tŭ geh ală bơta gơlik geh den pal lơh mơ nàng rơcang kơrian di tŭ, tơrmù ờ uă ngan hoàc huơr bè kòn bơnus kung bè phan bơna Dà lơgar, bal mờ làng bol dê”.

Broă càr Gia Lai lơh pràn broă bơcri priă lơh ală phan bơna bơtơ̆t rơbòng dà dờng, tàm tŭ càr Dăk Lăk tơnguh ală gùng dà broă lơh nàng rơcang kơrian mờ rềs àr bơh trồ tiah pà gŏ ală càr tàm Tây Nguyên gam tam gơl bơh bồ tơngoh rơcang kơrian tus mờ rơcang lài gơdờp mờ tam gơl trồ tiah. Phan bơna bơtơ̆t rơbòng dà, bal mờ bơta pràn yal lài, yal lài mờ rơcang kơrian rềs àr bơh trồ tiah, rơ̆p là tơngu me tờm kwơ màng nàng gàr niam ai làng bol in mờ geh sùm broă bơtàu tơnguh lơh sa suơn sre kơl jăp tàm bơta trồ tiah ngai sơlơ ờ niam mờ ờ git lài.