Mut tàm nam bơsram pa, càr Dăk Lăk kờp dŭ tơrmù 51% khà hìu bơsram dà lơgar tơnơ̆ tŭ rơndap tap sèng wơl ală hìu bơsram, ơdŭ bơsram tàm càr. Broă rơndap lơh do geh Mpồl Lơh kơnòl broă sùm Tỉnh ủy càr Dăk Lăk ai jơnau đơs tàm Pơrjum dơ̆ 27. Jat hơ̆, khà hìu bơsram mầm non gơmù bơh 356 gam 150 hìu bơsram; kâp 1 gơmù bơh 450 gam 134 hìu bơsram; kâp 2 gơmù bơh 284 gam 92 hìu bơsram. Tàm kâp pe, khà hìu bơsram kờp dŭ gơmù 10 hìu bơsram gơmù gam 68 hìu bơsram. Gah bơto bơsram broă lơh - bơto bơsram sùm kung geh rơndap tap sèng bơh 24 gơmù gam 5 anih tờm bơto bơtê broă lơh - bơto bơsram sùm mờ 4 hìu bơsram trung học broă lơh. Jat ồng Lương Nguyễn Minh Triết - Ƀí thư Tỉnh ủy càr Dăk Lăk, broă rơndap tap sèng, tơmut bal hìu bơsram ờ lơh gơ rềng tus kơnòm bơsram:

“Lài do, Lam bồ hìu bơsram mìng đơng lam 1 hìu bơsram lơm gời, tŭ do geh 5 sơnĕ hìu bơsram den tŭ tơngai tơrmù bơto tàm ală hìu bơsram bè lơi nàng bơsong bơta ờ tơl pơgru. Pơgru rơp ntrờn tàm ală sơnĕ hìu bơsram tàm bal dùl hìu bơsram 1 sàh dê, den pal rơndap bè lơi nàng gơ in dipal, den bơta do là pràn jak kơnòl, tam pà kâp, jàu gơnoar mờ pràn jak đơng lam lơh jat cau lam bồ hìu bơsram dê”.

Mut tàm nam bơsram pa, càr Lâm Đồng gơmù gam 825 hìu bơsram dà lơgar. Broă rơndap wơl ală hìu bơsram dà lơgar geh lam lơh dipal mờ khà kờp làng bol, ù tiah làng bol ơm kis mờ jơnau sồr atbồ pa. Broă rơndap lơh bal rơndap tap sèng hìu bơsram mầm non, pe kâp, anih bơto bơtê sùm dà lơgar càr Lâm Đồng dê dờp geh bơta ring bal uă ngan bơh mpồl kwang bàng atbồ dê. Ùr pơgru Phạm Thị Ngọc Bích - Lam bồ Hìu bơsram mầm non Dà Tông, sàh uă kal ke Đam Rông 4 pà git, Mpồl đơng lam mờ cau pơgru tàm hìu bơsram ring bal uă ngan mờ broă rơndap lơh tơmut bal Hìu bơsram mầm non Dà Tông mờ Hìu bơsram mầm non Dà Long:

“Jơnau lơh nền tơmut bal hìu bơsram sền bal nùs nhơm bơh mpồl atbồ kung bè să tờm añ dê den rơndap tap sèng bơh Cau lam bồ hìu bơsram gơmù lơh Phó Lam bồ halà lơh wơl pơgru den bol hi kung gam iang nùs lơh broă, ờ geh bơta lơi ờ. Bơh tŭ pa lik klờng añ neh lơh broă ndo, den tàng bơta đềt mềr kung bè bơta gơboh lời ai kơnòm bơsram in là uă ngan. Den tàng broă mờ tiah do halà tiah ndai sền bal kung ờ lơh gơ rềng bơta lơi. Ndrờm là drơng broă sền  gàr, bơto bơtê kơnòm mầm non in lơm”.

Nam bơsram 2026 -2027 gam tus rềp ngan. Tàm uă bơnah priă tă pal kơlôi rơcang oh kòn in lài mờ ngai mut nam bơsram pa, sră măi digơlan ờ di là bơnah priă pal tă uă ngan rlau jơh. Mơya, gơ wèt mờ ală hìu bơnhă priă jền lơh geh ờ uă, gal kòn lòt bơsram halà geh rài kis kal ke, do kung gam là dùl bơnah priă tă uă ngan. Bè hơ̆ den tàng, jơnau sồr bơh Anih duh broă Làng bol càr Gia Lai dê bè jơnau lơh nền lam lơh gùng dà broă lơh pà gời sră măi ai kơnòm bơsram gơ wèt ală mpồl geh dong kờl lài tàm ù tiah càr dê in geh gơtha ngan ngồn mờ cèng bơta niam chài kòn bơnus. Gia Lai kờp dŭ geh rlau 180 rbô nă kơnòm bơsram pe kâp gơ wèt cau geh dờp bơta dong kờl mờ kờp jơh priă tă lơh rlau 42 tơmàn đong.

Bal mờ broă ờ duh pal kơlôi rơcang sră măi oh kòn in, bơta chờ hờp dờng ngan rlau jơh làng bol kòn Kon Sơ Lăl, sàh Ia Khươl, càr Gia Lai dê là hìu bơsram pa dờng niam, sàng goh geh lơh rềp hìu tơn. Ală oh kơnòm bơsram ờ duh pal ngar mang, guh gờñ tai, ờ gam tai bơta rơngòt gơtìp dà tih dà lìu cò pơrdô pah tŭ nhai mìu càl rbut dờng tus. Gùng lòt tus hìu bơsram tŭ do mìng roh 2, 3 phuk lòt jơng lơngăp lơngai. Bi Wat, 38 sơnam ơm tàm ƀòn Kon Sơ Lăl, sàh Ia Khươl, càr Gia Lai yal:

“Tŭ ơm tàm ƀòn yau, kòn bol hi dê lòt bơsram pal guh bơh 5 jơ drim den hơ̆ sồng thàn tŭ jơ mut ơdŭ. Tŭ do, hìu bơsram rềp ƀòn, ƀuơn ngan. Bulah gam kal ke, mơya rơp lơh ngan nàng kơlôi rơcang 2 nă kòn in lòt bơsram. Nam bơsram pa do, blơi oh kòn in àu mpha pa, kong tàp pa, sră măi, sră cih wil tơl nàng lòt bơsram, nàng oh kòn in git sền sră, git cih, kơp kờñ rài kis bol khi dê tơnơ̆ do ờ huan bòl glar, kal ke. Ưn ngài ngan Đảng, Dà lơgar neh sền gròi bol hi in tơl ală bơta”.

 Gah bơto bơsram càr Lâm Đồng sền bal neh lơh sir broă lơh rơcang nàng bàr hìu bơsram ơm sa bic tơn kâp 1 mờ kâp 2 sàh Quảng Trực mờ sàh Thuận An  in lơh broă mơ tơn tàm nam bơsram sơn rờp 2026 - 2027. Bàr hìu bơsram geh jàu rơ wah kơnòm bơsram 60 ơdŭ bơsram, mờ 1 rbô 770 nă kơnòm bơsram bơh ơdŭ 1 tus ơdŭ 9. Tàm hơ̆, Hìu bơsram ơm sa bic tơn kâp 1 mờ kâp Thuận An rơ wah 30 ơdŭ mờ 870 nă kơnòm bơsram; Hìu bơsram ơm sa bic tơn kâp 1 mờ kâp 2 Quảng Trực rơ wah 30 ơdŭ bơsram mờ 900 nă kơnòm bơsram. Bàr hìu bơsram lơh broă tàm nam bơsram 2026 - 2027 pơgồp bơnah lơh geh tai bơta niam nàng kơnòm bơsram tiah nhàr lơgar in, ngan là kơnòm bơsram jơi bơtiàn dùl êt nă cau geh bơsram mờ ơm sa bic tàm hìu bơsram kơ̆ kơljap, ƀuơn ƀuài rlau. Bơh hơ̆, ală hìu bơsram ờ mìng pơgồp bơnah tơnguh cồng nha bơto bơsram lơm mờ gam rơhời lơh sir ală broă lơh bơto bơsram pal geh, lơh gơlik bơta tờm nàng bơtàu tơnguh kơ̆ kơljap jŏ jòng sùm tàm tiah nhàr lơgar càr dê.

Anih duh broă Làng bol càr Dăk Lăk ai lơh jat broă rơndap lơh bè bơyai lơh Dơ̆ sơn đờm mut nam bơsram pa 2026 - 2027 mờ Dơ̆ sơn đờm ngui ală hìu bơsram ơm sa bic tơn bàr kâp tàm ală sàh tiah nhàr lơgar ù gờl tàm càr Dăk Lăk. Jat broă rơndap lơh. Dơ̆ sơn đờm mut nam bơsram pa 2026 - 2027 rơp geh bơyai lơh dơ̆ lĕ bal tàm drim ngai 05/9 do. Tàm hơ̆, càr bơyai lơh Dơ̆ ai ngui ală hìu bơsram ơm sa bic tơn bàr kâp tàm ală sàh Buôn Đôn, Ia Lốp, Ia Rvê mờ Ea Rốk. Anih pờ tơlik tàm tơrbŏ tơn tờm ngan càr dê geh lơh tàm Hìu bơsram ơm sa bic tơn kâp 1 mờ kâp 2 sàh Buôn Đôn, tàm tơrbŏ tơn mờ anih pờ tơlik tờm tàm hìu bơsram ơm sa bic tơn Mường Khương, sàh Mường Khương, càr Lào Cai. Broă bơyai lơh Dơ̆ sơn đờm mut nam bơsram pa mờ ai ngui ală hìu bơsram ơm sa bic tơn bàr kâp nàng kờñ lơh gơlik nùs nhơm chờ hờp, chờ hờn, mblàng wơl bơta kờñ gơboh ai mpồl cau pơgru, kwang bàng atbồ bơto bơsram mờ kơnòm bơsram mut tàm nam bơsram pa.

Anih duh broă Làng bol càr Quảng Ngãi ai lơh jat Broă rơndap lơh bơyai lơh Sơn đờm mut nam bơsram pa 2026 - 2027 pơgồp bal mờ Dơ̆ ai ngui ală hìu bơsram ơm sa bic tơn bàr kâp tàm ală sàh tiah nhàr lơgar ù gờl. Jat broă rơndap lơh, drim ngai 05/9, càr rơp dơ̆ lĕ bal bơyai lơh ai ngui 4 hìu bơsram ơm sa bic tơn bàr kâp tàm ală sàh Dục Nông, Sa Loong, Rờ Kơi và Mô Rai. Hìu bơsram tờm geh ơn tàm Hìu bơsram ơm sa bic tơn kâp 1 mờ kâp 2 sàh Dục Nông, tàm tơrbŏ tơn tàm internet mờ broă lơh gùt lơgar, ală hìu bơsam gam wơl bơyai lơh pờ tơlik tàm internet dơ̆ lĕ bal. Dơ̆ sơn đờm mut nam bơsram pa mờ ai ngui hìu bơsram tiah nhàr lơgar nàng kờñ lơh gơlik nùs nhơm chờ hờp mut nam bơsram pa, đơs nền bơta sền gròi bơh Đảng, Dà lơgar dê gơ wèt mờ bơto bơsram tiah làng bol jơi bơtiàn dùl êt nă cau, tiah kơh bơnơm, tiah nhàr lơgar. Pơgồp bơnah tơnguh bơta niam bơsram sră mờ lơh geh tŭ niam geh bơsram sră ai kơnòm bơsram tiah kal ke in.