Tơnơ̆ mờ 40 nam tam gơl pa, ală cồng nha dờng màng, geh kwơ rài kah yau bè bơtàu tơnguh lơh sa mpồl bơtiàn, gàr kơl jăp cíñ trị, gàr niam dà lơgar lơngăp lơngai mờ tơrgùm bal ală lơgar jrô ơnàng neh lơh geh bơnàng jă kơl jăp, tơnguh nùs nhơm pin dờn bơh Làng bol dê gơwèt mờ Đảng. Mùl màl tàm Tây Nguyên là cơng tàng niam bơnĕ ai gŏ gùng dà broă lơh di pal hơ̆. Làng bol tiah jơi bơtiàn ờ gal cau kơ̆p gơn mờ cồng nha Pơrjum dờng dơ̆ XIV Đảng dê, ală gùng dà broă lơh ndrờm bal mờ bơta kwơ màng jŏ jòng rơ̆p geh lơh mhar.

Bi Y Sắc Ly Arul, tàm sơnah ƀòn Buôn Ma Thuột, càr Dăk Lăk tơlik nùs nhơm kơ̆p kờñ, ală kơrnoăt bal ờ gùng dà broă lơh kwơ màng Đảng dê, tàm hơ̆ uă ngan là gơwèt mờ tiah làng bol jơi bơtiàn ờ gal cau. “Añ kơ̆p kờñ Đảng mờ Dà lơgar pơn jăt tai sền gròi uă rơlao tai tus mờ làng bol jơi bơtiàn ờ gal cau, tàm hơ̆ geh làng bol kòn cau Rơđê bol añ dê; sền gròi tus mờ broă prăp gàr mờ ngui bơta niam chài rơgơi ờs mờng, pơgồp bal mờ bơtàu tơnguh lòt nhơl, nàng rài kis làng bol ngai sơlơ gơguh”.

Tàm ală nam do, broă sền gròi bơh Đảng mờ Dà lơgar bơh ală gùng dà broă lơh di pal neh lơh geh ală tam gơl niam tàm rài kis làng bol jơi bơtiàn ờ gal cau. Bơh phan bơna gùng lòt, bơto bơtê mờ bơsram, lơh sơnơm tus mờ broă dong kờl lơh sa, tơrmù rơƀah kơl jăp, prăp gàr bơta niam chài…, uă gùng dà broă lơh neh mŭt tàm rài kis, cèng geh cồng nha loh làng, geh Làng bol ring bal, kờñ bal. Tàm nùs nhơm chờ hờp cồng nha Pơrjum dờng dơ̆ XIV Đảng dê, ồng Hmên, tàm ƀòn Tuơh Ktu, sàh Đăk Đoa, càr Gia Lai pà git: “Añ gŏ gơlơh chờ hờp ngan, di nùs ngan tài kwang đơng lam bồ Dà lơgar sùm sền gròi ai geh ală gùng dà broă lơh kwơ màng, tàm hơ̆ uă ngan là ală gùng dà broă lơh ai tiah làng bol jơi bơtiàn ờ gal cau in, neh dong kờl ală bơta ai làng bol bol añ in. Añ pin dờn là: tus do Đảng, Dà lơgar pơn jăt tai sền gròi, pơn jăt tai đơng lam dà lơgar brồ guh, làng bol dùl nùs kờñ bal. Đảng rơ̆p geh ală broă lơh di pal nàng dà lơgar ngai sơlơ bơtàu tơnguh pràn kơl dang rơlao”.

Bơh tàm mùl màl rài kis, kwang bàng, đảng viên mờ Làng bol ală càr Tây Nguyên – Đah Jum tàm gùl lơgar pin dờn Đảng pơn jăt tai lơh gơs ală gùng dà broă lơh jơi bơtiàn dê jăt gùng dà tơnguh bơta pràn tàm dơlam is, ai làng bol lơh tờm bơh broă bơtàu tơnguh, bơh bơtàu tơnguh lòt nhơl mpồl bơtiàn tus mờ broă tơnguh bơcri priă phan bơna, gàr niam rài kis broă lơh broă sa kơl jăp tềng đăp mờ tam gơl nhơm trồ tiah. Mò Rơ Châm H’ Yéo, Củ tịc Anih duh broă Mặt trận dà lơgar Việt Nam càr Gia Lai lài do đơs nền, nùs nhơm pin dờn tàm Đảng neh geh bơ̆t bơtàu bơh uă rơnàng mờ tŭ do pơn jăt tai geh tơnguh: “Làng bol Tây Nguyên sùm dùl nùs jăt Đảng, jăt Wa Hồ. Kơ̆p kờn Đảng he pơn jăt tai sền gròi, ai tơl bơta niam nàng Tây Nguyên bơtàu tơnguh lơh sa, niam chài, bơto bơtê mờ bơsram, mờ broă bơ̆t bơtàu Tây Nguyên pas gơs bè lơh sa, geh uă bè bơta ngăc ngar”.