Đơs tàm pơrjum, Củ tịc Quôk hội ồng Trần Thanh Mẫn, Củ tịc Mpồl duhbroă Tĕ khà Dà lơgar đơs nền, dơ̆ tĕ khà neh lơh geh cồng nha niam ngan, ngan ngồn gơ gơs là dơ̆ pơrjum cíñ trị làm uă, ngai chờ dờng bơh jơh gùt làng bol dê, geh mpồl bơtiàn tàm lơgar mờ bơdìh lơgar cih dờp, đơs niam. Cồng nha, cau tĕ khà gùt lơgar neh lòt tĕ khà pồ tơl 500 nă cau ala mat Quôk hội, 2 rbô 552 nă cau ala mat Mpồl duh broă Làng bol kâp càr mờ 72 rbô 438 nă cau ala mat Mpồl duh broă Làng bol kâp sàh. Ală khà kờp do ai gŏ, broă lơh rơcang kwang bàng geh lam lơh jơh nùs, làng bol lơh tờm, di jơnau cih bơh adat boh lam dê. Do kung là tŭ tơngai kuơmàng ngan tàm broă rơndap lơh lơh sir Dà lơgar gơnoar adat boh lam sàh hội củ nghĩa bơh làng bol dê, tài làng bol, mờ kung lơh geh tam gơl pa mpồl lơh broă sră pơ àr gơnoar atbồ, lơh broă gơnoar atbồ ƀòn lơgar 2 kâp mờ lơh pràn tam gơl sồ, ngui măi mok tàm atbồ mpồl bơtiàn.