Broă lơh tĕ khà cau ala mat Quôk hội khoă XVI mờ cau ala mat Mpồl duh broă Làng bol ală kâp, tơngai lơh broă bơh nam 2026 tus nam 2031 tàm càr Dăk Lăk geh lơh di tŭ tơngai, gàr niam ờdo ờdă, jơh nùs mờ di jơnau cih bơh adat boh lam dê. Jat jơnau yal bơh Anih duh broă tĕ khà càr Dăk Lăk dê, gùt càr geh mờr 2 tơlak 300 rbô nă cau tĕ khà lòt tĕ khà.

Kờp tus 7 jơ mang ngai 15/3, khà cau tĕ khà lòt đùh sră geh rlau 99,9%. Pal đơs là, neh geh uă sàh, sơnah ƀòn lơh gơs 100% khà cau tĕ khà lòt đùh sră. Cồng nha do ai gŏ, nùs nhơm geh kơnòl, bơta ring bal dồ nùs mờ nùs nhơm git wă cíñ trị uă bơh cau tĕ khà tàm càr dê. Jat Anih duh broă tĕ khà càr Dăk Lăk, bulah khà cau tĕ khà lòt đùh sră uă ngan, ală sàh, sơnah ƀòn tàm càr kung ờ sền ờ sơp, pơn jat tai lam lơh ndrờm bal ală broă lơh gàr niam lơngăp lơngai, ờdo ờdă tàm ală tiah đùh sră. Mpồl kwang àng, ling klàng mờ ală mpồl lơh broă geh gơnoar gàr sùm broă lơh lòt sền, gròi sền nàng git broă gơlik geh tàm ƀòn lơgar, crăp rơcang bơsong ală broă gơlik geh, gàr dơ̆ tĕ khà geh lơh niam ờdo ờdă jơh ală bơta.