Tàm dơ̆ wă, Thứ trưởng Ƀộ Cribơyai broă mờ lơgar ndai ồng Đặng Hoàng Giang đơs nền, Việt Nam mờ gơnoar broă đơng lam pơgồp bal bơta git gơp đah ASEAN mờ Anh, tơngai bơh nam 2024 tus nam 2027 rơp pơn jat tai pơgồp bal jơh nùs mờ đah lơgar Anh nàng kờñ ai tơlik lài gùng dà bơta git gơp đah ASEAN mờ Anh bơtàu tơnguh pràn kơldang, tơl làm, jŏ jòng mờ kuơmàng, dipal mờ jơnau kờñ lơh broă bal bơh 2 gah dê mờ gơ dờp mờ jơnau sồr bơh bơta pa dê.

Việt Nam kung gam jơh nùs đơng lam pơgồp bal, sồr bơt bơtàu Broă rơndap lơh lơh broă ASEAN – Anh tơngai bơh nam 2027 tus nam 2031, tơrgùm tàm ală gah lơh broă bal ai lài bè lơh sa, priă jền, tam gơl tơlir, bơtàu tơnguh kơnhăp jŏ, drơng mờ tam gơl nhơm trồ tiah, tam gơl pa, bơceh lơh, lơh broă bal dà lềng… Bè bơta git gơp 2 gah, ồng Đặng Hoàng Giang đơs niam bơta dong kờl bơh lơgar Anh dê lời ai Việt Nam in tàm broă bơt bơtàu Anih tờm priă jền ală lơgar, chồl tơnguh lơh broă bal tàm ală gah, sồr lơgar Anh jơh nùs tam pà mờng chài bè tam gơl năng lượng sàng goh.