Jăt jơnau yal, tàm bơta năng lượng tàm dunia gơtìp kal ke, lơh jăt jơnau sồr bơh Cíñ phủ dê, ală ƀộ, gah lơh broă dà lơgar neh tus bal pràn, tàm hơ̆ uă ngan là Ƀộ Lơh sa mờ măi mok Kă bro phan nàng gàr ring niam priă tăc xăng jờu. Mpồl lơh broă tơl năng lượng neh ai geh jơnau lơh nàng kơl jăp mờ sền gròi xăng jờu tàm nhai 3, rơcang bơta gơlik geh tàm ală nhai pơn jăt tai in.

Đơs tàm pơrjum, Thủ tướng ồng Phạm Minh Chính đơs nền jơnau kờñ bañ lời gơtìp ờ tơl năng lượng tàm ală bơta lơi. Thủ tướng neh cih sră mờ cri bơyai tàm điện thoại mờ ală kwang đơng lam gơrềng tus năng lượng; lơh pràn broă cri bơyai broă mờ lơgar ndai năng lượng tàm bơta kal ke; ală ƀộ, gah lơh broă tàm dà lơgar neh lơh broă pràn jăt mờ gơnoar bal mờ kơnòl, jòi geh khà ai; mờ tơlik mơ Jơnau sồr nàng pơgồp bal tàm broă đơng lam di pal priă tăc xăng jờu. Thủ tướng sồr lơh geh uă khà ai jờu gam bè ờs; lơh jăt mơ cồng nha cri bơyai bơh Thủ tướng mờ ală lơgar lơh broă bal bè UAE, Kuwait,… nàng tơnguh khà geh, gàr tơl 30% khà xăng jờu bơh broă blơi bơh lơgar bơdìh dê.

Tàm bơta tŭ do, Thủ tướng hòi jà làng bol bañ kơlôi rơcang, bañ ngòt, bañ sền ờ sơ̆p. Jơh gùt làng bol tam klăc bal, ring bal sơrlèt mờ kal ke, pleh mờ broă lòt blơi uă nàng prăp, lơh ờ niam drà kă bro, prăp xăng jờu, tơnguh priă tăc… Thủ tướng jào Ƀộ Lơh sa mờ măi mok Kă bro phan tơrgùm kơlôi sơnơng lơh jăt broă prăp gàr jờu dà lơgar; bơ̆t bơtàu broă lơh kwơ màng lơh tờm năng lượng ai dà lơgar in; Ƀộ Priă jền ai geh kes priă bơh khà priă prăp rơcang lài nàng tơl năng lượng dà lơgar.