Tàm dơ̆ cribơyai tàm điện thoại, Thủ tướng Cíñ phủ ồng Phạm Minh Chính đơs nền Việt Nam crăp rcang tus bal ală bơta lơh ngan bal bơh mpồl bơtiàn ală lơgar dê, tàm hơ̆ geh Asean, nàng kờñ jòi broă lơh ring lơngai ai dơ̆ tam lơh tŭ do in. Tàm tơngai bơta tam lơh gơlik geh kal ke, Thủ tướng Cíñ phủ ưn ngài mờ sồr Cíñ phủ lơgar Qatar pơn jat tai sền gròi, gàr niam lơngăp lơngai, ờ do ờ dă ai làng bol Việt Nam tàm Qatar mờ lơh geh ală bơta ƀuơn ngan ai làng bol Việt Nam tus tàm lơgar Qatar.

Thủ tướng lơgar Qatar đơs nền rơ̆p sền gàr lơngăp lơngai, ờ do ờ dă ai làng bol Việt Nam in “bè làng bol Qatar sơl”. Bè lơh broă bal năng lượng đah 2 lơgar tàm tơngai tŭ do, Thủ tướng lơgar Qatar đơs nền gam lơh ngan lơh jat tơl làm ală jơnau hơ, sră pơrgon lơh broă mờ ală lơgar lơh broă bal, crăp rcang lơh broă bal niam nàng kờñ gàr niam bơta kơ̆ kơl jăp lơh gơlik năng lượng tàm lơgar Việt Nam.