Nam 2025 là nam sơnrờp Ƀộ Bơ̆t bơtàu lơh broă jăt broă tơrlòng lơh pa tơnơ̆ mờ tŭ tơrgùm bal  dùl, khà broă lơh gơguh uă, ù tiah atbồ dờng ơnàng, tơrgùm bal uă gah broă dờng, kal ke. Ƀộ Bơ̆t bơtàu neh tơrgùm sồr lơh ală kơnòl tờm, geh uă cồng nha pơnrơ ngan, tàm hơ̆ geh broă lơh gơs broă ai rơndeh lòt gơl gùng rơndeh lòt mhar Đah Tô - Đah Jum bơh càr Cao Bằng tus càr Cà Mau, kờp dŭ tus lồi nam 2025 lơh gơs 3 rơbô 345 kơi sồ gùng tờm rơndeh lòt mhar.

Thủ tướng jờng rơ broă pơgồp bal bơh gah do dê tàm broă bơtàu tơnguh phan bơna, hìu ơm mpồl bơtiàn, lơh hìu bơsram tàm tiah nhàr lơgar, lơh geh tiah drà, bơ̆t bơtàu ƀòn lơgar pa, tơn jơh hìu sèt. Thủ tướng đơs nền, nam 2026 jơnau kờñ geh ai uă ngan, tàm hơ̆ gơguh lơh sa pal geh 2 sồ, den tàng gah Bơ̆t bơtàu pal lơh ngan gơguh lơh sa 2 sồ. Bè rơndăp broă lơh gơl gùng rơndeh ồs lòt mhar đah Tô - Đah Jum, Thủ tướng sồr: tàm nhai 12 do sền wơl bơta geh nàng tus nhai 01 nam 2026 rơwah geh gùng dà bơcri priă, rơwah geh măi mok; tàm nhai 01 nam 2026 pal rơwah geh gùng dà bơcri priă lơh.