Drim òr (08/12), tàm tiah nhàr lơgar càr Tây Ninh mờ càr Prey Veng lơgar Camphuchia, Thủ tướng Cíñ phủ ồng Phạm Minh Chính mờ Thủ tướng lơgar Campuchia ồng Hunmanet neh đơng lam bal Dơ̆ ai ngui bàr mpồng nhàr lơgar ală lơgar Tân Nam mờ Meun Chey.

Đơs tàm dơ̆ pơrjum, Thủ tướng ồng Phạm Minh Chính đơs nền bàr mpồng nhàr lơgar ală lơgar Tân Nam mờ Meun Chey pờ geh “mpồng kă bro phan” pa, pơgồp bal tàm broă tơnguh broă pơgồp bal lơh sa, kă bro phan, lòt nhơl mờ tìp bal làng bol đah bàr lơgar, mờ tơnguh broă tơrbŏ bal git gơ̆p, lơh bơyô bal, lơh broă bal jŏ jòng. Thủ tướng đơs nền lơgar Việt Nam mờ lơgar Campuchia là bàr lơgar rềp bal, đềt mềr, geh bal dà dờng Mekong, bơ̆t bơtàu bơta git gơ̆p “lơgar rềp bal niam bơnĕ, lơh bơyô bal ờs mờng, lơh broă bal tơl ală bơta, kơl jăp jŏ jòng” tàm mờr 60 nam do. Mpồl mpồng nhàr lơgar ală lơgar jăt gah nhàr lơgar geh gơnoar kwơ màng tàm broă bơtàu tơnguh lơh sa tiah. Khà kă bro phan đah bàr lơgar tàm ală nam pa do geh sùm tàm khà di pơgăp 10 tơmàn Dolar Mỹ tàm 1 nam mờ kờp dŭ nam 2025 di gơlan tus 12 tơmàn Dolar Mỹ.