Drim ngai 10/12, tàm Hìu lơh broă Cíñ phủ, Thủ tướng ồng Phạm Minh Chính đơng lam pơrjum Cíñ phủ tơm bơh bơr mờ cau lơh broă sa Việt Nam nam 2025 mờ tơngume : “Ngui jak chài măi mok, tam gơl pa bơceh lơh mờ tam gơl sồ tàm cau lơh broă sa” mờ 150 nă cau ala mat cau lơh broă sa, lơh broă bal, mpồl lơh sa kă bro mờ ală cau gĭt wă jrô broă lơh, cau jak chài. Tàm dơ̆ tơm bơh bơr, Thủ tướng mờ đơng lam bồ ală Ƀộ, gah broă hơ tơn ală jơnau lùp bơh cau lơh broă sa dê. Thủ tướng ồng Phạm Minh Chính sồr Ƀộ Jak chài mờ Măi mok gàr niam geh tơl gùng pờ gùng internet, geh gùng che ồs đèng, pờ gùng 5G, sồr ală Tập đoàn ồs đèng, viễn thông pờ tơl gùng pờ internet mờ gùng che ồs đèng ai cau lơh broă sa tiah sar lơgar ngài, tiah bồt bơlào dà lềng, tiah kal ke in, bơdìh mờ sơlơ tơnguh tai bơt bơtàu Cíñ phủ sồ, mpồl bơhiàn sồ, làng bol sồ.

Gơrềng tus broă lơh tăc mờ blơi phe bơh lơgar ndai, Thủ tướng ồng Phạm Minh Chính sồr Ƀộ Priă jền; Ƀộ broă lơh sa suơn sre mờ Tiah ơm kis rcang lài tŭ giă kòi phe gơmù den Dà lơgar blơi ai cau lơh broă sa in, nàng ơn prap Dà lơgar, mơkung rcang lài pờ ơnàng drà kă bro pa ai tăc mờ blơi phe bơh lơgar ndai, nàng ờ gŏ di lời cau lơh broă sa in gơtìp rơmơ̆p ndơl.