Dơ̆ tìp mat geh bơyai lơh tàm tơngai Việt Nam pa bơyai lơh geh cồng nha Pơrjum dờng cau ala mat gùt lơgar dơ̆ XIV bơh Đảng dê mờ Việt Nam mờ EU ngan ngồn tơnguh bơta gĭt gơ̆p gơguh tus Tam klăc lơh broă bal kwơ màng tơl làm. Thủ tướng đơs nền EU mờ ală lơgar tàm mpồl là lơgar lơh broă bal kwơ màng lam lài tàm broă lơh lơh broă mờ lơgar ndai bơh lơgar Việt Nam dê; broă lơh geh tơngume bơta gĭt gơ̆p pa yal tơngĭt bơta pin dờn cíñ trị ngai sơlơ uă mờ lơh geh bơta gơn kơnờm nàng pờ ơnàng lơh broă bal tàm tơl gah broă.

Đơs bè bơta gĭt gơ̆p Việt Nam mờ EU, Thủ tướng tơngŏ bơta niam nùs tềng đăp ală broă lơh bơtàu tơnguh niam ngan tơnơ̆ 35 nam lơh geh bơta gĭt gơ̆p cribơyai broă mờ lơgar ndai (1990–2025). Broă lam lơh geh cồng nha Jơnau kĭ hơ Kă bro phan khat gơboh Việt Nam mờ EU (EVFTA) neh pơgồp bơnah ai EU gơ gơs lơgar tam klăc lơh broă bal kă bro phan dờng dơ̆ 4 bơh lơgar Việt Nam dê, tàm tŭ Việt Nam là lơgar lơh broă bal kă bro phan dờng ngan rlau jơh bơh EU dê tàm Asean. Lơh broă bal tàm ală gah sền gàr dà lơgar- lơngăp lơngai, tam gơl nhơm trồ tiah, broă lơh sa suơn sre, sền gàr adat boh lam, jak chài măi mok, tiah ơm kis... kung gam geh pờ ơnàng mờ uă bơta ƀuơn bơta pràn. Thủ tướng sồr 2 gah pơn jat tai sơlơ tơnguh tai lơh broă bal tàm nùs nhơm geh kwơ bal, lam lơh geh cồng nha  EVFTA, sơlơ tơnguh tai kă bro phan pờ mờ tàm pơn ring, lơh geh bơta ƀuơn ngan ai broă tus bal tàm drà kă bro mờ gàr niam bơta kwơ di pal bơh mpồl lơh sa kă bro 2 gah dê.