Tàm dơ̆ wă, Thủ tướng Cíñ phủ đơs sùm, tàm bơta kơnhoàl ù tiah do mờ dunia uă bơta gơ tam gơl tŭ do, bơta tam klăc, lơh bơyô ờs mờng bơh yau mờ lơh broă bal tơl làm đah bàr lơgar là bơnàng jă nàng bàr jơi bơtiàn bal mờ gơ̆p sền gàr ring lơngai, kơ̆ kơl jăp, lơh niam broă bơ̆t bơtàu rài lơh sa lơh is rơcăng lài is mơya bal mờ gơ̆p tam klăc nàng bơtàu tơngguh kơnhăp jŏ.

Bàr nă kwang đơng lam sền gŏ gĭt gơ̆p Việt Nam mờ Campuchia pơn jăt tai bơtàu tơngguh niam bơnĕ ngan tàm jơh ală broă. Gĭt gơ̆p cíñ trị mờ lơh broă mờ lơgar ndai pơn jăt tai geh sơlơ tơngguh, tơnggŏ bơh broă bàr đah sùm tàm pơgơl mpồl kwang bàng lòt còp bal mờ gơ̆p, tìp măt ală kâp. Lơh broă bal sền gàr dà lơgar mờ lơngăp lơngai pơn jăt tai lơh gơnoar broă tờm. Lơh broă bal lơh sa pơn jăt tai là bơta àng mờ priă geh bơh kă bro phan đah 2 lơgar gơguh jơnhoa. Lơh broă bal bơto bơtê, niam chài, lòt nhơl, tìp măt lơh kwèng làng bol geh sền gròi, lơh pràn.