Mho ngai 14/01, Thủ tướng ồng Phạm Minh Chính đơng lam Dar pơrjum dơ̆ prau bơh Mpồl Sồr lơh Dà lơgar dê lam lơh jăt hơ pơrgon bơh Việt Nam dê tàm Pơrjum COP 26. Đơs pơndŭt dar pơrjum, Thủ tướng đơs nền broă Việt Nam geh ală hơ pơrgon pràn kơldang tàm COP 26, tàm hơ̆ geh jơnau kờñ lơh geh khà sang nhơm ƀơ̆ tus tiah ơm kis ndrờm mờ “jero” tàm nam 2025, là jơnau lơh nền di ngan, tơnggŏ kơnòl uă mờ mpồl bơtiàn ală lơgar mờ tài bơta bơtàu tơngguh kơnhăp jŏ bơh dà lơgar dê.

Thủ tướng đơs niam ngan nùs nhơm rơcăng lài, jơh nùs mờ lơh ngan bơh ală ƀộ, gah, ƀòn lơgar, mpồl bơtiàn mpồl lơh sa kă bro mờ làng bol dê tàm lam lơh jăt ală kơnòl broă neh sồr lơh. Jăt Thủ tướng, lơh jăt jơnau kờñ sang nhơm ƀơ̆ tus tiah ơm kis ndrờm mờ “jero” là bơta lòng dờng mơya kung pờ gơlik tŭ niam nàng rơndăp tăp sèng wơl rài lơh sa jăt gùng tơlir, kơnhăp jŏ, tơngguh bơta lơh is, rơcăng lài is mờ pràn tàm pơrlòng. Kơryan tam gơl nhơm trồ tiah là kơnòl broă pal lơh jăt, tàm hơ̆ làng bol mờ mpồl lơh sa kă bro là anih tờm mơkung là cau tờm, să tờm tơn tus bal mờ lơh jăt wil tơl kơnòl bơh he dê.