Mho òr (12/01), Thủ tướng Cíñ phủ ồng Phạm Minh Chính, Lam bồ Mpồl Sồr lơh Dà lơgar bè ală jơnau yal tơngit, neh đơng lam Dar pơrjum dơ̆ Sơnrờp Mpồl Sồr lơh dê, geh bơyai lơh tơn tàm Hìu lơh broă Cíñ phủ mờ pờ tơlik tàm internet mờ 34 càr, ƀòn dờng tàm gùt lơgar.

Jăt jơnau yal, broă lơh jăt tơngu me jơnau yal tơngit dà lơgar bè làng bol ơm kis neh cèng geh cồng nha mùl màl, mờ 107 tơlăk jơnau yal tơngit làng bol geh atbồ mờ 50 bơta kwơ geh ai tàm VNeID, pơgồp bal koh tơrmù bơh 30 tus 50% khà priă lơh jăt ai làng bol bal mờ mpồl lơh sa kă bro in. Tus tŭ do, 3 rơbô 321 sàh, sơnah ƀòn neh ndrờm bal jơnau yal tơngit tàm anih prăp gàr jơnau yal tơngit dà lơgar bè ù tiah. Đơs tàm dơ̆ sồr lơh, Thủ tướng đơs sùm, jơnau yal tơngit là tơngu me tờm nàng bơtàu tơnguh bồ tơngoh ngăc ngar, den tàng jơh ală ƀộ, gah lơh broă dà lơgar, ală càr, ƀòn dờng pal mhar lơh, tơrbŏ bal mờ lơh geh cồng nha ală anih yal tơngit. Thủ tướng đơs nền, lơngăp lơngai jơnau yal tơngit pal ndrờm bal mờ broă sền gàr bơta lơngăp lơngai bơh gùt lơgar, jơi bơtiàn dê mờ rơlao 100 tơlăk nă làng bol.