Mho òr (23/12) tàm Hìu lơh broă Cíñ phủ, Thủ tướng Cíñ phủ ồng Phạm Minh Chính đơng lam dơ̆ pơrjum Sùm Cíñ phủ nàng pơgồp jơnau sền wơl, tă bơsong kal ke ai ală rơndăp broă lơh phan bơna gùng rơndeh ồs tờm. Hơ̆ là ală tơl gùng: gùng rơndeh ồs Lào Cai – Hà Nội – Hải Phòng, gùng rơndeh ồs lòt mhar Đah tô – Đah jum mờ ală gơl gùng rơndeh ồs tiah drà tàm Hà Nội, ƀòn dờng Hồ Chí Minh.

Đơs pơn dŭt pơrjum, Thủ tướng dồ ală ƀộ, gah lơh broă, ală càr ƀòn dờng neh lơh ngan tus bal, lơh uă bơnah broă kwơ màng tàm nam 2025, tàm hơ̆ uă ngan là broă tam gơl Adăt Gùng rơndeh ồs, lơh gơs gùng dà broă lơh nàng lơh pràn lơh jăt rơndăp broă. Thủ tướng sồr Ƀộ Bơta chài mờ Măi mok, Ƀộ Bơ̆t bơtàu sền wơl khà geh ai bơh ală lơgar dê, rơwah măi mok di pal ai gùng rơndeh ồs lòt mhar in, gàr geh cồng nha bơta chài, lơh sa, cri bơyai broă mờ lơgar ndai. Mờ rơndăp broă lơh Lào Cai – Hà Nội - Hải Phòng, sồr pal lơh di mờ tơngai geh ai, lơh ngan lơh gơs lài cồng nha lơyài ngan tus nhai 03 nam 2026; mờ lơh mhar broă lơh gơl gùng trồm tiah drà tàm Hà Nội, ƀòn dờng Hồ Chí Minh.