Tàm dơ̆ pơrjum, ală cau ala măt đơs niam tàm bàr nhai bồ nam 2026, càr Điện Biên lơh geh ờ uă cồng nha niam, uă gah broă geh tam gơl, ai geh bơnàng jă ai jơnau kờñ gơguh lơh sa tàm gùt nam in. Đơs pơn dŭt dơ̆ lơh broă, Thủ tướng sồr càr lơh pràn, lơh ndrờm bal ală gùng dà broă lơh, lơh ngan geh khà gơguh lơh sa bơh 11% rơlao hờ đang tàm nam 2026.

Tàm hơ̆, càr pal tơrgùm lơh geh cồng nha ală hìu măi pờ tơlik ồs đèng dà, lơh pràn broă bơtàu tơnguh lơh sa mờ măi mok lơh gơs phan, năng lượng; mờ lơh pràn broă bơ̆t bơtàu wơl lơh sa suơn sre jăt gùng dà broă lơh gơs phan kă bro, bơ̆t bơtàu kơrnoăt boh lam, broă dong kờl làng bol lơh broă sa suơn sre tam gơl phan tam, bơtàu tơnguh tòm măk ka, kơphe mờ ală phan tam tờm.

Tàm mang ngai bal, tus Lơh chờ Bơkào Ban mờ tơngu me “Bơkào Ban –Kơ̆p kờñ ngan Điện Biên dê”, Thủ tướng tơlik nùs nhơm kơ̆p gơn càr pơn jăt tai đòm jăt nhơm tam klăc bal, prăp gàr mờ lơh geh uă bơta niam chài, lơh bơta geh bơh ù tiah geh is gơs bơta pràn bơtàu tơnguh kơl jăp ai tiah Tây Bắc in.